Qlobal əmtəə bazarlarında strateji sənaye metallarının qiymətində kəskin bahalaşma dalğası qeydə alınıb. ABŞ və İran arasında davam edən hərbi toqquşmalar fonunda Yaxın Şərqdən xammal tədarükündə ciddi fasilələrin yaranması riskləri alüminiumun qiymətini son dörd ildən çox müddətin ən yüksək səviyyəsinə daşıyıb.
Beynəlxalq treyderlərin verdiyi məlumata görə, qlobal metal ticarətinin mərkəzi hesab olunan London Metal Birjasında (LME) etalon alüminium kotirovkaları kəskin yüksəliş nümayiş etdirib. Birjanın son ticarət sessiyasında alüminiumun bir tonunun qiyməti 0,6% artaraq 3 690 dollara yüksəlib.
Sessiya ərzində qiymətlər bir ara 3 707,50 dollar səviyyəsinə qədər qalxıb. Bu göstərici sonuncu dəfə 2022-ci il mayın 26-da qeydə alınmışdı. Beləliklə, alüminium bazarı rəsmən 2022-ci ilin martından (Ukrayna müharibəsinin başladığı dövrdən) bəri ən yüksək həddə çatıb.
Alüminium qiymətlərinin bu dərəcədə həssas reaksiya verməsi birbaşa olaraq Yaxın Şərq regionunun qlobal metallurgiya sənayesindəki rolu ilə bağlıdır. Dünyadakı ümumi alüminium istehsal güclərinin təxminən 9%-i məhz Yaxın Şərq ölkələrinin payına düşür. regionda logistikanın əsas arteriyası olan Hörmüz boğazının qismən və ya tam bağlanması ixracat xətlərini iflic edib.
Bu qıtlıq alüminiumdan xammal kimi asılı olan nəhəng qlobal sənaye sahələrində zəncirvari böhrana yol açır:
-
Avtomobil və maşınqayırma istehsalı;
-
Aerokosmik və təyyarəqayırma sənayesi;
-
İnşaat və müasir tikinti materiallarının hazırlanması;
-
Qida sektoru (içki və qida qablarının istehsalı).
MONETAR.AZ
