Gürcüstanın Axalkalaki dəmir yolu stansiyasında (Axalkalaki Beynəlxalq Dəmir Yolu və Logistika Kompleksi) regionun ən strateji infrastruktur layihələrindən biri olan Bakı–Tbilisi–Qars (BTQ) dəmir yolu xəttinin tam gücü ilə fəaliyyətə başlaması münasibətilə rəsmi açılış mərasimi keçirilib.
Mərasimdə Gürcüstanın Baş naziri İrakli Kobaxidze, Azərbaycanın rəqəmsal inkişaf və nəqliyyat naziri Rəşad Nəbiyev, "Azərbaycan Dəmir Yolları" QSC-nin sədri Rövşən Rüstəmov, Türkiyənin nəqliyyat və infrastruktur naziri Abdulkadir Uraloğlu və digər yüksək rütbəli rəsmilər iştirak ediblər.
BTQ dəmir yolu xətti 2017-ci ildən etibarən sınaq/test rejimində fəaliyyət göstərsə də, qlobal yük axınını tam qəbul etmək üçün xəttin Gürcüstan hissəsində genişmiqyaslı yenidənqurma işlərinə ehtiyac var idi. 2023-cü ilin may ayından etibarən başlayan genişmiqyaslı təmir-bərpa və yenidənqurma işləri uğurla tamamlanıb. Layihə çərçivəsində Gürcüstan ərazisində 184 kilometrlik xətt reabilitasiya edilib, 13 stansiya, 55 körpü və 300-dən çox köməkçi bina tikilib və ya tamamilə yenilənib. Aparılmış bu əsaslı rekonstruksiya işləri nəticəsində magistralın illik yükdaşıma qabiliyyəti 1 milyon tondan 5 milyon tona qədər (5 dəfə) artırılıb.
Açılış mərasimində çıxış edən rəsmilər bu xəttin qlobal logistikadakı rolunu xüsusi vurğulayıblar. BTQ sadəcə üç ölkəni birləşdirən regional layihə deyil, həm də qlobal miqyaslı nəqliyyat arteriyasıdır.
BTQ dəmir yolu xətti Çin və Mərkəzi Asiyanı Cənubi Qafqaz üzərindən Avropa ilə birləşdirən "Orta Dəhliz"in (Middle Corridor) ən kritik quru hissəsini təşkil edir. Bu marşrut ənənəvi dəniz daşımaları ilə müqayisədə yüklərin Asiyadan Avropaya çatdırılma müddətini əhəmiyyətli dərəcədə qısaldır (təxminən 15 günə) və regional təhlükəsizliyi təmin edərək şimal marşrutlarına (Rusiya ərazisinə) güclü alternativ yaradır.
