Avstraliyada əmək bazarının vəziyyətinin pisləşdiyini göstərən oktyabr statistikası ölkənin milli valyutasına ciddi təzyiq göstərib. Bu gün Avstraliya dolları ABŞ dollarına qarşı 0,55% ucuzlaşaraq son doqquz ayın ən aşağı səviyyəsinə – 0,6681-ə enib.
Hesabata əsasən, ölkədə işsizlik səviyyəsi 2021-ci ilin sonundan bəri ilk dəfə ən yüksək həddə çataraq 4,9%-ə yüksəlib. Ümumi məşğulluq isə proqnozların əksinə olaraq 43 500 nəfər azalıb. Halbuki iqtisadçılar bu göstəricidə 25 500 nəfərlik artım gözləyirdilər.
Beləliklə, Avstraliyada məşğulluq ardıcıl ikinci ay azalıb. İşsizlərin sayı isə 17 800 nəfər artaraq 753 700 nəfərə çatıb. Göstəricilər əmək bazarında geriləmənin gözləniləndən daha ciddi olduğunu ortaya qoyub.
Statistikanın açıqlanması Avstraliya Ehtiyat Bankının yaxın dövrdə faiz dərəcələrini yenidən artıracağı ilə bağlı bazar gözləntilərini də zəiflədib. Həftənin əvvəlində dərc olunan iclas protokollarından məlum olmuşdu ki, direktorlar şurasının doqquz üzvündən üçü noyabr ayında faiz dərəcəsinin 4,85%-ə yüksəldilməsinə qarşı çıxıb. Həmin üzvlər iqtisadiyyatın daha kəskin tənəzzülə yaxınlaşa biləcəyi barədə xəbərdarlıq ediblər. Yeni əmək bazarı göstəriciləri onların narahatlıqlarını daha da gücləndirib.
ASX indeks fyuçersləri dekabr ayında faiz artımı ehtimalını artıq çox aşağı qiymətləndirir. Bu isə Avstraliya və ABŞ dolları arasındakı faiz fərqinin AUD/USD cütlüyünə verdiyi dəstəyi zəiflədir. Eyni zamanda, cütlüyün sentyabr zirvəsindən təxminən 7% ucuzlaşması texniki göstəricilərdə eniş meyillərinin üstünlük təşkil etdiyini göstərir.
ABŞ dollarının möhkəmlənməsi də Avstraliya valyutasının mövqeyini çətinləşdirir. Federal Ehtiyat Sisteminin (FED) dekabr ayında faiz dərəcələrini artıracağına dair gözləntilərin güclənməsi fonunda dollar bu həftə son 19 ayın maksimumuna yüksəlib.
MONETAR.AZ