Üç ardıcıl enişli sessiyadan sonra bu gün qızılın qiyməti yenidən yüksəlib. ABŞ dollarının zəifləməsi qiymətli metala dəstək versə də, Yaxın Şərqdə yenidən alovlanan gərginlik və artan inflyasiya riskləri bazar iştirakçılarının diqqətini gələn həftə keçiriləcək ABŞ Federal Ehtiyat Sisteminin (FED) iclasına yönəldib.
Bakı vaxtı ilə saat 01:33-ə olan məlumata görə, XAU/USD (spot qızıl) 0,4% bahalaşaraq bir unsiya üçün 4 374,32 dollara yüksəlib. Qızıl fyuçersləri isə 0,5% azalaraq 4 418,11 dollar səviyyəsində ticarət olunub. Eyni zamanda, XAG/USD (gümüş) 0,7% artaraq unsiya üçün 66,19 dollara, XPT/USD (platin) isə 1,2% bahalaşaraq 1 840,52 dollara çatıb. ABŞ dollarının indeksi (DXY) isə cüzi geriləyərək 98,82 bənd səviyyəsinə enib.
Analitiklərin fikrincə, dolların zəifləməsi qızıla qısamüddətli dəstək versə də, enerji qiymətlərinin yüksəlməsi inflyasiya gözləntilərini artırır və FED-in faiz dərəcələrini daha da yüksəldə biləcəyi ehtimalını gündəmdə saxlayır. Bu amillər təhlükəsiz liman aktivi kimi qızıla olan tələbi dəstəkləsə də, yüksək faiz dərəcələri onun gəlir gətirməyən aktiv kimi cəlbediciliyini məhdudlaşdıra bilər.
MONETAR.AZ
