ABŞ birjalarında kənd təsərrüfatı məhsullarının fyuçers qiymətlərində qarışıq dinamika görülür. Buğda və qarğıdalı ucuzlaşdığı halda, soya fyuçersləri cüzi bahalaşıb. Bazar iştirakçılarının diqqəti həmçinin iri taxıl sövdələşmələrinə və ABŞ Kənd Təsərrüfatı Nazirliyinin (USDA) növbəti hesabatına yönəlib.
Dekabr ayı üzrə buğda fyuçersləri 0,26% azalaraq bir buşel üçün 6,044 dollara enib. Həftəlik geriləmə 0,93% təşkil edib. Qeyd edək ki, bazar ertəsi günü üç əsas birjada buğdanın qiyməti 2–3 sent artmışdı.
Qarğıdalının dekabr müqavilələri 0,28% ucuzlaşaraq bir buşel üçün 4,465 dollara düşüb. Həftə ərzində qiymət itkisi 0,47% olub.
Soya bazarında isə əks istiqamətli hərəkət qeydə alınıb. Yanvar fyuçersləri 0,21% bahalaşaraq bir buşel üçün 12,185 dollara yüksəlib. Bununla belə, bazar ertəsi günü soya qiymətləri cari ticarət dövrünün minimum səviyyələrini yeniləyib və yanvar müqavilələri 17,5 sent ucuzlaşıb.
Fondlar buğda bazarında 80 min müqavilədən çox qısa mövqeyə malikdirlər. Bu göstəricilər bazar iştirakçılarının soya məhsullarına münasibətdə daha nikbin, buğdaya münasibətdə isə daha ehtiyatlı mövqe tutduğunu göstərir.
“Blue Reef Agri-Marketing” şirkətinin analitiki Çip Nellinqerin sözlərinə görə, Meksika bazar ertəsi günü təxminən 69 milyon buşel qarğıdalı alıb.
Sövdələşmənin 44,7 milyon buşellik hissəsi cari marketinq ilinə, qalan həcm isə 2027–2028-ci illər mövsümünə aiddir. Nellinger bu alışı uzun müddətdən bəri qarğıdalı bazarında qeydə alınan ən böyük satışlardan biri və son aylarda Meksika ilə bağlanan ilk iri sövdələşmə kimi qiymətləndirib.
Analitik həmçinin hesab edir ki, buğda qiymətləri ötən həftə minimum səviyyəyə çatıb. Onun fikrincə, bazar Qara dəniz regionunda mümkün sülh sazişini gözləyir. Bu arada Rusiya buğdasının bir hissəsinin Kerç boğazı vasitəsilə daşınması davam edir.
Kənd təsərrüfatı bazarlarının diqqət mərkəzində gələn həftənin çərşənbə axşamı dərc olunacaq USDA-nın WASDE hesabatı da var.
Dünya kənd təsərrüfatı məhsullarının təklif və tələbinə dair qiymətləndirmələri əhatə edən hesabatda istehsal, istehlak, ixrac və ehtiyatlarla bağlı proqnozların açıqlanması gözlənilir. Bu göstəricilər taxıl və yağlı bitkilər bazarında qiymətlərin növbəti istiqamətinə təsir edə bilər.
MONETAR.AZ