“Volkswagen” Çinin elektromobil bazarında yerli istehsalçılarla rəqabətdə mövqelərini gücləndirmək məqsədilə çərşənbə axşamı “Xpeng” şirkəti ilə birgə hazırladığı ikinci modelin ön satışlarına başlayıb.
ID. UNYX 09 adlandırılan yeni elektrikli fastbek-sedan “Volkswagen”in Çində avtomobil hazırlama prosesini sürətləndirməyə və BYD, “Geely” kimi yerli istehsalçılarla daha səmərəli rəqabət aparmağa yönəlmiş “Çində, Çin üçün” strategiyası çərçivəsində hazırlanıb.
“Volkswagen”in “Xpeng”lə tərəfdaşlığı alman avtomobil istehsalçısının Çindəki strategiyasının əsas istiqamətlərindən birinə çevrilib. Şirkətlər bu ilin əvvəlində birgə hazırladıqları ilk model – ID. UNYX 08 yolsuzluq avtomobilini (SUV) satışa çıxarıblar.
“Volkswagen”in məlumatına görə, şirkətin 2026-cı ilin ilk yarısında Çinə avtomobil tədarükü illik müqayisədə 26 faiz azalaraq 971 min ədədə düşüb. Bu, şirkətin Çindəki satışlarının son 16 ilin ən aşağı səviyyəsinə enməsi deməkdir.
Yeni modelin hazırlanma müddəti isə əvvəlki layihələrlə müqayisədə əhəmiyyətli dərəcədə qısaldılıb. “Volkswagen” bildirib ki, Çində hazırlanmış yeni avtomobil arxitekturası sayəsində ID. UNYX 09 cəmi 24 ay ərzində istehsala buraxılıb. Bu müddət əvvəlki layihələrlə müqayisədə təxminən 30 faiz daha qısadır.
Orta və böyük ölçülü elektrik sedanı CATL batareyaları ilə təchiz olunub. Avtomobildə həmçinin “Xpeng”in VLA intellektual sürücüyə yardım sistemi tətbiq edilib.
Modelin istehsalı “Volkswagen”in Şanxaydan qərbdə yerləşən Hefey şəhərindəki zavodunda həyata keçirilir. Eyni müəssisədə ID. UNYX 08 modelinin də istehsalı təşkil olunub.
ID. UNYX 09 üçün ön satış qiyməti 199 900 yuandan, yəni təxminən 29 785 dollardan başlayır. Avtomobilin rəsmi satışlarına isə oktyabrın sonunda başlanması planlaşdırılır.
“Volkswagen” bu il Çin bazarına akkumulyatorlu elektrik avtomobilləri və qoşulan hibridlərdən (PHEV) ibarət 20-dən çox yeni model çıxarmağı planlaşdırır.
Qeyd edək ki, “Volkswagen” 2023-cü ildə “Xpeng” şirkətinin 5 faizlik payını əldə edib. İki şirkət arasında əməkdaşlıq alman istehsalçısının Çin bazarında yerli texnologiya və istehsal imkanlarından daha geniş istifadə etmək strategiyasının mühüm hissəsinə çevrilib.
MONETAR.AZ
