İsveçrənin premium şokolad istehsalçısı Lindt & Sprüngli şirkətinin baş icraçı direktoru Adalbert Lexner vəzifəsindən ayrılır. Şirkətdə 33 il çalışan və 2022-ci ilin oktyabrından CEO vəzifəsini tutan Lechnerin gedişi satış artımının zəiflədiyi dövrə təsadüf edir.
Şirkət rəhbərliyində dəyişiklik qlobal bazarlarda satış dinamikasını bərpa etmək və biznesin inkişafına yeni təkan vermək məqsədi daşıyır.
Yeni daimi baş icraçı direktor təyin edilənədək bu vəzifəni şirkətin İdarə Heyətinin sədr müavini və keçmiş CEO-su Diter Vayskopf icra edəcək. O, 2022-ci ilədək altı il ərzində şirkətə rəhbərlik edib.
Lindt & Sprüngli yeni CEO-nun seçilməsi prosesinə başlayıb. Şirkət təyinatın 2027-ci ilin ikinci rübünədək başa çatdırılmasını gözləyir.
Dəyişikliklər şirkətin Almaniya bölməsini də əhatə edir. Ən böyük bazarlardan biri olan Almaniyadakı strukturun rəhbəri Mixal Şpiller də vəzifəsindən ayrılır. Onu hazırda Avstriya bölməsinə rəhbərlik edən Ali Kulein əvəz edəcək.
Rəhbərlik dəyişikliyi şirkətin 2026-cı il üzrə satış gözləntilərini bir neçə dəfə aşağı salmasından sonra baş verir.
Lindt & Sprüngli əvvəlcə cari il üçün üzvi satış artımının 6–8% olacağını proqnozlaşdırırdı. Sonradan bu göstərici 4%-ə endirilib. Sentyabrda isə sifarişlərin gözləniləndən zəif olması səbəbindən proqnoz 0–2% səviyyəsinə salınıb.
Satış dinamikasının zəifləməsi və kakao da daxil olmaqla xammal qiymətlərinin yüksək qalması şirkətin mənfəətliliyinə təzyiq göstərir. Bu fonda Lindt & Sprüngli səhmləri ilin əvvəlindən bəri 25%-dən çox dəyər itirib.
Müvəqqəti CEO Diter Vayskopf əsas prioritetinin şirkətin mənfəət marjasını qorumaq və yeni daimi rəhbərə dayanıqlı biznes modeli, eləcə də güclü inkişaf perspektivləri olan şirkət təhvil vermək olduğunu bildirib.
MONETAR.AZ
