Tuğ Qoruğunun Bərpası "OMAR NN GROUP"a Həvalə Edildi: Müqavilə 840 Min Manata Bağlandı
Azərbaycan Respublikasının Dövlət Turizm Agentliyi tərəfindən Xocavənd rayonunun Tuğ kəndində yerləşən “Tuğ” Dövlət Tarix-Memarlıq və Təbiət Qoruğu ərazisində tikinti və yenidənqurma işlərinin satın alınması üzrə keçirilən tenderin qalibi müəyyənləşib.
Tenderin nəticələrinə əsasən, layihənin icrası "OMAR NN GROUP" MMC-yə həvalə olunub. Tərəflər arasında bağlanmış müqavilənin dəyəri 840 min 853,33 manat təşkil edir.
Satınalma sənədlərinə görə, layihə Dövlət Turizm Agentliyi tərəfindən 2026/AT/00947/V1 nömrəli müsabiqə çərçivəsində həyata keçirilib. Satınalmanın predmeti Tuğ qoruğunun ərazisində tikinti və yenidənqurma işlərinin aparılmasıdır.
Tender üzrə ilkin ehtimal olunan qiymət 1 milyon 200 min 994 manat müəyyən edilmişdi. Qalib şirkətin təqdim etdiyi təklif isə bu məbləğdən 360 min 140,67 manat aşağı olub. Beləliklə, satınalma nəticəsində ehtimal olunan qiymətlə müqayisədə təxminən 30 faiz qənaət əldə edilib.
Mütəxəssislərin fikrincə, belə qiymət fərqləri dövlət vəsaitlərinə qənaət baxımından müsbət qiymətləndirilsə də, tarixi-mədəni irs obyektlərində aparılan bərpa və yenidənqurma işlərində keyfiyyət standartlarının qorunması xüsusi əhəmiyyət daşıyır.
Qeyd edək ki, Tuğ kəndi Qarabağın zəngin tarixi-mədəni irsə malik yaşayış məntəqələrindən biri hesab olunur. Qoruq ərazisində həyata keçiriləcək yenidənqurma işlərinin bölgənin turizm potensialının artırılmasına, tarixi irs nümunələrinin qorunmasına və gələcəkdə turist axınının genişlənməsinə töhfə verəcəyi gözlənilir.
Müqavilənin imzalanması ilə layihənin icra mərhələsinə start verilib və yaxın dövrdə ərazidə tikinti-bərpa işlərinin başlanacağı gözlənilir.
MONETAR.AZ
