Azərbaycanda ictimai iaşə sektorunda bu ilin ilk 7 ayında dövriyyə 1 milyard 718,8 milyon manata çatıb. Bu göstərici hesablamalara görə, gündəlik orta hesabla təxminən 8,1 milyon manatlıq ictimai iaşə dövriyyəsi formalaşması deməkdir.
Monetar.az xəbər verir ki, Dövlət Statistika Komitəsinin məlumatına əsasən, ictimai iaşə dövriyyəsi 2025-ci ilin eyni dövrü ilə müqayisədə real ifadədə 7,1 faiz artıb.
Beləliklə, yanvar-iyul aylarında ictimai iaşə obyektlərində orta aylıq dövriyyə təxminən 245,5 milyon manat təşkil edib. Yeddi ay ərzində 212 təqvim günü olduğu nəzərə alındıqda, gündəlik orta dövriyyə 8,1 milyon manatdan çox olub.
Sektor üzrə dövriyyənin əsas hissəsi özəl sektorun payına düşüb. Özəl ictimai iaşə dövriyyəsinin 49,9 faizi hüquqi şəxslərin, 50,1 faizi isə sahibkarlıq fəaliyyəti ilə məşğul olan fiziki şəxslərin payına düşüb.
Hüquqi şəxslər üzrə dövriyyə 2025-ci ilin müvafiq dövrü ilə müqayisədə 5 faiz artaraq 853,9 milyon manata çatıb. Bu göstərici həmin kateqoriya üzrə gündəlik orta hesabla təxminən 4 milyon manat dövriyyə deməkdir.
Məlumatlar göstərir ki, ictimai iaşə bazarında dövriyyənin təxminən yarısı hüquqi şəxslərin, digər yarısı isə fərdi sahibkarların fəaliyyəti hesabına formalaşır. Bu isə restoran, kafe və digər iaşə obyektlərinin istehlak bazarında əhəmiyyətli paya malik olduğunu göstərir.
