Çinin ən böyük sənaye bölgələrindən biri olan Quanqdonq vilayətində elektrik enerjisinin spot qiymətləri demək olar ki, iki dəfə artaraq meqavat-saat üçün 100 dollara çatıb. Bu barədə Bloomberg məlumat yayıb.
Böhranın əsas səbəbi Yaxın Şərqdən mayeləşdirilmiş təbii qaz (LNG) tədarükündə yaranan fasilələrdir. Ötən illə müqayisədə vilayətə dəniz yolu ilə LNG idxalı təxminən 40% azalıb.
Vəziyyəti daha da ağırlaşdıran amillərdən biri yerli enerji nəhəngi Guangdong Energy Groupnun Qətərin QatarEnergy şirkəti ilə qaz alışı üzrə 10 illik müqavilənin icrasını təhlükəsiz gəmiçiliyin mümkün olmaması səbəbilə dayandırması olub.
Vilayətdə qazla işləyən elektrik stansiyaları ümumi gücün beşdə birindən çoxunu təmin edir. Xammal çatışmazlığı nəticəsində hazırda qazdan elektrik enerjisi istehsalı bərpa olunan mənbələrlə müqayisədə 60%-dən çox baha başa gəlir.
Sənaye müəssisələri enerjinin 80%-ni əvvəlki uzunmüddətli müqavilələr əsasında alsalar da, məhz bahalı spot bazar ümumi qiymətlərin yüksəlməsinə təkan verir.
Eyni zamanda, yüksək tələbat da vəziyyətə təsir edir. Birinci rübdə vilayətdə elektrik istehlakı sənayenin bərpası və neyroşəbəkələr üçün məlumat mərkəzlərinin fəaliyyəti nəticəsində 7,6% artıb.
Yay aylarında, xüsusilə kondisionerlərin istifadəsinin artması və El Niño fonunda gözlənilən anomal istilər səbəbilə mümkün elektrik kəsintilərinin qarşısını almaq üçün hakimiyyət enerji balansını dəyişir. Quanqdonq vilayəti qaz istifadəsini azaldır, kömürə keçidi genişləndirir və nüvə enerjisinin inkişafını sürətləndirir. Artıq 20 aprel tarixində bölgədə yeni nüvə reaktoru istifadəyə verilib.
