Kubada uzun müddətdir davam edən iqtisadi böhran Vaşinqtonun sanksiya təzyiqlərini artırmasından sonra humanitar fəlakət həddinə çatıb. Associated Press (AP) agentliyinin bölgədən hazırladığı geniş hesata görə, ABŞ-ın tətbiq etdiyi sərt neft blokadası nəticəsində adanın su təchizatı sistemi iflic vəziyyətinə düşüb. Hazırda ölkənin su infrastrukturu normal fəaliyyət üçün ehtiyac duyduğu yanacağın yalnız 37%-ni əldə edə bilir.
Kuba Dövlət Milli Su Ehtiyatları İnstitutunun prezidenti Antonio Rodriges mövcud böhranın texniki tərəflərini açıqlayaraq vəziyyətin kritik olduğunu bildirib. Onun sözlərinə görə, ölkədəki suyun nasoslarla çəkilməsi, təmizlənməsi və paylanması şəbəkəsi milli miqyasda ən böyük enerji istehlakçılarından biridir.
Təxminən üç milyon kubalı hər gün kəskin neft çatışmazlığı səbəbindən birbaşa su qıtlığı ilə qarşılaşır. Kuba hakimiyyəti yaranmış humanitar böhranın bütün məsuliyyətini birbaşa ABŞ-ın enerji blokadasının üzərinə qoyur.
Paytaxt Havanada suyun xüsusi çənlər quraşdırılmış avtomobillərlə (su daşıyan maşınlar) paylanması qeyri-müntəzəm xarakter alıb. Sakinlər gündəlik ehtiyaclarını qarşılamaq və evlərinə su ehtiyatı toplamaq üçün kilometrlərlə yolu piyada qət edərək şəhərin digər hissələrinə getməyə məcbur olurlar.
Kubanın enerji sisteminin tamamilə çökməsi cari ilin yanvar ayında Yaxın Şərq və Latın Amerikası coğrafiyasında baş verən kəskin geosiyasi dəyişikliklərlə bağlıdır.
Kuba illərdir əsas iqtisadi və ideoloji müttəfiqi olan Venesueladan güzəştli şərtlərlə neft idxal edirdi. Lakin yanvar ayında ABŞ hərbçilərinin Venesuela lideri Nikolas Maduronu saxlamasından sonra Karakasdan Havanaya gedən mühüm neft tədarükü tamamilə kəsildi.
Bu hadisənin ardınca ABŞ prezidenti Donald Tramp Kubanı tamamilə təcrid etmək məqsədilə yeni icra sərəncamı imzalayıb. Həmin fərmana əsasən, Kubaya hər hansı formada yanacaq və neft məhsulları tədarük edən istənilən üçüncü ölkəyə qarşı ABŞ tərəfindən ağır rüsumların və sanksiyaların tətbiq edilməsi nəzərdə tutulur. Bu təhdid isə digər xarici treyderlərin Kubaya yaxınlaşmasının qarşısını alır.
MONETAR.AZ
