Dünya Bankı 2026-cı maliyyə ili üçün ölkələrin gəlir təsnifatını açıqlayıb. Monetar.az xəbər verir ki, 218 iqtisadiyyatın daxil edildiyi yeni təsnifata əsasən, Azərbaycan yuxarı orta gəlirli ölkələr qrupunda qərarlaşıb.
Dünya Bankı ölkələri adambaşına düşən ümumi milli gəlir (ÜMG) göstəricisinə əsasən dörd qrupa ayırır: yüksək gəlirli, yuxarı orta gəlirli, aşağı orta gəlirli və aşağı gəlirli ölkələr.
Yeni təsnifata əsasən, 87 ölkə yüksək gəlirli, 59 ölkə yuxarı orta gəlirli, 47 ölkə aşağı orta gəlirli, 25 ölkə isə aşağı gəlirli ölkələr qrupuna daxil edilib.
2026-cı il üçün yüksək gəlirli ölkələr kateqoriyasına düşmək üçün adambaşına ÜMG 14 min 375 dollardan yuxarı olmalıdır. Yuxarı orta gəlirli ölkələr üçün bu göstərici 4 min 636–14 min 375 dollar, aşağı orta gəlirli ölkələr üçün 1 min 176–4 min 635 dollar, aşağı gəlirli ölkələr üçün isə 1 min 175 dollar və daha aşağı səviyyədə müəyyən edilib.
Bu il 6 ölkə daha yüksək gəlir qrupuna yüksəlib. Vyetnam, Filippin, Şri-Lanka, İordaniya və Mikroneziya aşağı orta gəlirli qrupdan yuxarı orta gəlirli qrupa keçib. Toqo isə aşağı gəlirli ölkələr qrupundan aşağı orta gəlirli kateqoriyaya yüksəlib.
Dünya Bankının məlumatına görə, bu dəyişikliklər əsasən iqtisadi artım, pandemiyadan sonrakı bərpa prosesi, statistik yenilənmələr və əhali göstəricilərindəki dəyişikliklərlə bağlıdır.
Araşdırmaya əsasən, aşağı gəlirli ölkələrin əksəriyyəti Qərbi, Mərkəzi və Şərqi Afrikanın bəzi hissələrində yerləşir. Bu ölkələrdə iqtisadi inkişafın qarşısını alan əsas amillər sırasında münaqişələr, zəif infrastruktur, institusional problemlər və aşağı məhsuldarlıq göstərilir.
Mütəxəssislər qeyd edirlər ki, gəlir qrupları ölkələrin iqtisadi səviyyəsini müqayisə etmək üçün mühüm göstərici olsa da, bu təsnifat əhalinin gəlir bölgüsünü, yaşayış xərclərini və insanların real həyat səviyyəsini tam əks etdirmir.
