Polşa hökuməti fiziki şəxslərin gəlir vergisi sistemində dəyişikliklərə hazırlaşır. Baş nazir Donald Tuskun açıqladığı yeni vergi paketi orta gəlirli vətəndaşların vergi yükünün azaldılmasını nəzərdə tutur. Büdcə gəlirlərində yaranacaq azalmanı kompensasiya etmək üçün isə iri şirkətlər üçün mənfəət vergisi artırılacaq.
Yeni qaydalara əsasən, gəlir vergisinin ikinci pilləsi üzrə hədd 120 min zlotıdan 130 min zlotıya (təxminən 34,9 min ABŞ dolları) yüksəldiləcək.
Hökumətin planına əsasən, ikinci vergi pilləsi üzrə gəlirlər 24% dərəcə ilə vergiyə cəlb olunacaq. Eyni zamanda, fiziki şəxslər üçün maksimal gəlir vergisi dərəcəsi 32% səviyyəsində saxlanılacaq.
Bundan başqa, həmrəylik vergisinin də 1 faiz bəndi artırılması nəzərdə tutulur.
Fiziki şəxslər üçün nəzərdə tutulan güzəştlərin dövlət büdcəsinə təsirini kompensasiya etmək məqsədilə hökumət iri biznes üçün vergi yükünü artırmağı planlaşdırır.
Belə ki, illik gəliri 50 milyon avrodan çox olan şirkətlər üçün mənfəət vergisi dərəcəsi 19%-dən 22%-ə qaldırılacaq. Bu dəyişiklik yalnız böyük dövriyyəyə malik müəssisələrə şamil ediləcək.
Baş nazir Donald Tusk bildirib ki, təqdim olunan vergi islahatlarının əsas məqsədi orta təbəqənin maliyyə yükünü yüngülləşdirməkdir.
Hökumətin yanaşmasına görə, fərdi gəlir vergisində nəzərdə tutulan güzəştlər əhalinin alıcılıq qabiliyyətini artırmalı, büdcə gəlirlərində yaranacaq itkilər isə iri şirkətlər üçün tətbiq ediləcək daha yüksək mənfəət vergisi hesabına balanslaşdırılmalıdır.
MONETAR.AZ
