Avropa Mərkəzi Bankı (AMB) Avrozonada inflyasiyanın azalmasına baxmayaraq, qiymət artımının hələ də arzuolunan səviyyədən yüksək qaldığını bildirir.
AMB-nin baş iqtisadçısı Filip Leyn İrlandiyada keçirilən tədbirdə çıxışı zamanı qeyd edib ki, Avrozonada inflyasiyanın hazırkı 3 faizlik səviyyəsi əvvəlki illərlə müqayisədə daha mülayim görünsə də, Mərkəzi Bankın əsas məqsədindən hələ də uzaqdır.
Onun sözlərinə görə, hazırkı inflyasiya göstəricisi AMB-nin müəyyən etdiyi 2 faizlik hədəfi bir faiz bəndi üstələyir. Bu fərq 2022-ci ildə qeydə alınmış ikirəqəmli inflyasiya fonunda böyük görünməsə də, mərkəzi bankların pul siyasəti baxımından kifayət qədər əhəmiyyətli hesab olunur.
Filip Leyn vurğulayıb ki, iqtisadi şoklar zamanı faiz dərəcələrinin dəyişdirilməsi ilə bağlı qərarlar məhz belə kənarlaşmalar nəzərə alınmaqla qəbul edilir. Buna görə də inflyasiyanın hədəfdən bir faiz bəndi yüksək qalması AMB üçün diqqətdən kənarda qala bilməz.
Baş iqtisadçının açıqlamaları Avropa Mərkəzi Bankının inflyasiyanı uzunmüddətli perspektivdə yenidən 2 faiz səviyyəsinə qaytarmaq niyyətində olduğunu bir daha nümayiş etdirir.
Bazar iştirakçıları hesab edirlər ki, inflyasiyanın hədəfdən yüksək qalması AMB-nin pul siyasəti ilə bağlı qərarlarında ehtiyatlı mövqeyini qorumasına səbəb ola bilər. Bu baxımdan qarşıdakı aylarda açıqlanacaq makroiqtisadi göstəricilər və qiymət dinamikası Avrozonada faiz dərəcələrinin gələcək istiqamətinin müəyyənləşdirilməsində əsas rol oynayacaq.
MONETAR.AZ
