ABŞ Prezidenti Donald Trump-ın 13–15 may tarixlərində Çin Xalq Respublikasına dövlət səfəri dünya siyasətində və qlobal bazarlarda diqqətlə izlənilir.
Məlumata görə, bu, ABŞ Prezidentinin 2017-ci ildən bəri Pekinə ilk səfəridir. Görüşün əsas mövzuları sırasında İran ətrafındakı vəziyyət, Tayvan məsələsi, nadir torpaq elementləri, nüvə silahları, ticarət münasibətləri və texnologiyalar sahəsində rəqabət yer alır.
Danışıqlarda Çin Xalq Respublikasının Sədri Xi Jinping ilə Donald Trump arasında iqtisadi və siyasi məsələlərin geniş spektri müzakirə olunacaq.
Analitiklər hesab edirlər ki, tərəflər arasında ciddi irəliləyiş ehtimalı aşağıdır. Bununla belə, müəyyən sahələrdə razılaşmaların əldə olunması istisna edilmir.
Beynəlxalq ekspertlərin fikrincə, əsas müzakirə mövzularından biri İran ətrafındakı gərginlikdir. Çin İran neftinin ən böyük alıcılarından biri kimi çıxış edir və Vaşinqton Pekinin regionda təsir imkanlarından istifadə etməyə çalışır.
Eyni zamanda texnologiya sahəsində süni intellekt və yarımkeçiricilər üzrə əməkdaşlıq imkanları da gündəmdədir. ABŞ və Çin rəsmiləri bu sahədə rəqabətin idarə olunmasına dair danışıqlar aparmağı planlaşdırır.
Müzakirələrdə həmçinin nadir torpaq elementləri, ticarət tarifləri və investisiya məhdudiyyətləri kimi iqtisadi məsələlər də əsas yer tutur.
Ekspertlər bildirirlər ki, böyük “tarixi razılaşma” ehtimalı zəif olsa da, ticarət gərginliyinin müəyyən qədər yumşaldılması və ayrı-ayrı sahələr üzrə texniki razılaşmaların əldə olunması mümkündür.
Bununla yanaşı, analitiklər ABŞ və Çin arasında texnologiya və enerji bazarlarında rəqabətin davam edəcəyini, bu səbəbdən genişmiqyaslı strateji kompromisin yaxın perspektivdə çətin görünəcəyini vurğulayırlar.
MONETAR.AZ
