Bloomberg-ın məlumatına görə, analitik şirkət Crisil Coalition Greenwich-in hesablamalarına əsasən, 2025-ci ildə qlobal bankların qiymətli metallar üzrə ticarət bölmələrinin ümumi gəliri rekord səviyyəyə — 3,9 milyard dollara çatıb. Bu, son 10 ilin ən yüksək göstəricisidir.
Qızıl və gümüş qiymətləri 1979-cu ildən bəri ən güclü artımı nümayiş etdirib. Bu rallinin əsas katalizatoru isə ABŞ prezidenti Donald Trampın yenidən hakimiyyətə qayıtması olub. Əvvəlcə onun sərt idxal tarifləri siyasəti, daha sonra isə Federal Ehtiyatlar müstəqilliyinə təsir göstərmək cəhdləri investorları narahat edib.
Məhz tariflərlə bağlı gözləntilər banklar üçün əsas gəlir mənbəyinə çevrilib. ABŞ-da qızıl və gümüşə yeni yüksək idxal rüsumlarının tətbiq edilə biləcəyi ehtimalı Nyu-York və London bazarları arasında böyük qiymət fərqi yaradıb.
Bu vəziyyət fiziki metala və güclü logistika imkanlarına malik treyderlər üçün böyük fürsət olub: onlar Londonda daha ucuz qiymətə metal alaraq ABŞ-da daha yüksək qiymətlə satıb və ya fyuçers müqavilələri üzrə çatdırıblar.
Angad Chhatwal bildirib ki, bəzi banklar zərər etsə də, digərləri bu arbitraj imkanından böyük gəlir əldə edib və bu, ötən il bankların mənfəətinin əsas hərəkətverici qüvvəsi olub.
Əvvəlki rekord 2020-ci ildə pandemiya dövründə qeydə alınmışdı. O zaman hava nəqliyyatının dayanması külçələrin daşınmasını çətinləşdirmiş və oxşar qiymət fərqləri yaratmışdı.
2025-ci ildəki yüksək gəlirlər yalnız qiymət fərqləri ilə deyil, həm də hedc-fondlar və iri aktiv idarəçiləri tərəfindən artan tələblə bağlı olub. London bazarında ticarət həcmləri il boyu artıb və bu, bir çox maliyyə institutlarını, o cümlədən Nomura Holdings və Deutsche Bank kimi qurumları qiymətli metallar üzrə fəaliyyətlərini genişləndirməyə vadar edib.
Ekspertlərin fikrincə, bu sahə hazırda son dərəcə gəlirlidir və bir çox bank ya sıfırdan bu bazara daxil olmağa, ya da uzun fasilədən sonra geri qayıtmağa çalışır.
MONETAR.AZ
