2026-cı ilin birinci rübündə qlobal smartfon tədarükləri illik müqayisədə 6% azalıb. Counterpoint Research-in ilkin qiymətləndirmələrinə görə, DRAM və NAND yaddaş komponentlərinin çatışmazlığı tədarük zəncirlərini pozub və istehsalçıların xərclərini artırıb.
Apple ilk dəfə olaraq ilin birinci rübündə qlobal smartfon bazarına liderlik edərək 21% pay əldə edib və bu göstərici ötən ilin eyni dövrü ilə müqayisədə 5% artım deməkdir. iPhone 17 seriyasına yüksək tələbat, aqressiv trade-in proqramları və effektiv tədarük zənciri idarəçiliyi şirkətin nəticələrinə müsbət təsir göstərib. Apple xüsusilə Çin, Hindistan və Yaponiya bazarlarında daha güclü artım nümayiş etdirib.
Samsung-un tədarükləri rüb ərzində 6% azalıb və bazar payı 20% təşkil edib. Bu azalma Galaxy S26 modelinin təqdimatının təxirə salınması və aşağı qiymət seqmentində zəifliklə əlaqələndirilir. Bununla belə, S26 seriyasına ilkin maraq yüksək olaraq qalır və ən çox tələbat Ultra versiyasına yönəlib. Şirkət məhsul portfelini yeniləyərək büdcə modellərinin sayını azaldıb və başlanğıc qiymətləri artırıb.
Xiaomi tədarüklərdə 13% azalma yaşasa da, 13% bazar payı ilə üçüncü yeri qoruyub. Şirkət qiymətə həssas aşağı seqmentdən asılı olduğuna görə yaddaş komponentlərinin bahalaşmasından daha çox təsirlənib. Bununla belə, Xiaomi 17 seriyası Çində premium seqmentdə yaxşı nəticə göstərib.
OPPO və vivo müvafiq olaraq 11% və 8% bazar payı ilə dördüncü və beşinci yerləri tutublar. Vivo tədarüklərdə 2% azalma yaşasa da, orta seqment modelləri sayəsində Hindistan bazarında liderliyini qoruyub. OPPO isə aşağı seqmentdə A5 series ilə güclü nəticələr göstərib.
Google və Nothing isə müvafiq olaraq 14% və 25% artım əldə ediblər. Google-un Pixel xətti süni intellekt və hesablama fotoqrafiyası imkanları sayəsində inkişaf etmiş bazarlarda payını artırıb, Nothing şirkətinin Phone (4a) modeli isə istehlakçılar tərəfindən böyük maraqla qarşılanıb.
Counterpoint Research-in baş analitiki Şilpi Cayn bildirib ki, tədarüklərin azalmasının əsas səbəbi yaddaş istehsalçılarının istehlak elektronikası əvəzinə süni intellekt üçün məlumat mərkəzlərinə üstünlük verməsidir. Bu isə avadanlıq istehsalçılarının mənfəət marjasını azaldır və artan xərclərin birbaşa istehlakçılara ötürülməsinə səbəb olur.
Enerji qiymətlərinin artması, logistika xərclərinin yüksəlməsi və Yaxın Şərqdəki gərginlik istehlak tələbatını zəif saxlayıb və bərpa olunmuş (refurbished) cihazlara marağı artırıb. Yaddaş çatışmazlığı və xərclərin artması xüsusilə qiymətə həssas seqmentlərə təsir edib, premium cihaz istehsalçıları isə nisbətən daha dayanıqlı qalıblar.
2026-cı il üzrə proqnozlar zəif olaraq qalır, çünki yaddaş çatışmazlığının 2027-ci ilin sonuna qədər davam edə biləcəyi gözlənilir. İstehsalçıların həcm əvəzinə dəyərə üstünlük verməsi, aşağı marjalı modelləri azaltması və böyümə üçün proqram təminatı və xidmətlərə daha çox fokuslanması gözlənilir.
MONETAR.AZ
