Dünyada 30 milyon ABŞ dollarından çox sərvətə sahib olan ultra varlı şəxslərin sayı bir çox ölkədə sürətlə artmaqdadır.
“Knight Frank Wealth Report 2026” hesabatına əsasən, 2021–2026-cı illər arasında ultra zənginlərin ən çox artacağı ölkə ABŞ olacaq. Proqnozlara görə, ABŞ-də bu kateqoriyaya aid şəxslərin sayı təxminən 67 min nəfər artacaq.
Çin ikinci yerdə qərarlaşıb və həmin dövrdə 22 mindən çox yeni ultra zəngin şəxsin yaranacağı gözlənilir. Hindistan, Almaniya və İsveçrə də siyahıda ilk beşlikdə yer alır.
Hesabatda qeyd olunur ki, ABŞ güclü kapital bazarları və texnologiya sektoru sayəsində ultra varlıların sayının ən sürətli artdığı ölkə olaraq qalır.
Bununla yanaşı, bəzi ölkələrdə artım tempi daha yüksək faiz göstəriciləri ilə müşahidə olunur. Polşa ultra zənginlərin sayında 109 faiz artımla birinci yerdədir. Qətər 107 faiz, Türkiyə isə 94 faiz artımla ilk üçlükdə yer alıb.
Analitiklərin fikrincə, bu artım sənaye inkişafı, enerji gəlirləri, investisiya axınları və iqtisadi diversifikasiya siyasətləri ilə bağlıdır.
Hesabatda həmçinin qeyd olunur ki, Hindistan həm ümumi artım sayına, həm də faiz göstəricisinə görə qlobal zənginlik artımında önəmli mövqeyə sahibdir.
Mütəxəssislər bildirirlər ki, qlobal sərvət xəritəsi dəyişir və yeni iqtisadi mərkəzlər getdikcə daha çox ultra varlı şəxslər formalaşdırır.
