Qurban bayramı günlərində işğaldan azad olunmuş ərazilərdə məskunlaşan əhalinin tələbatını tam və təhlükəsiz şəkildə qarşılamaq məqsədilə genişmiqyaslı hazırlıq işləri yekunlaşıb. Azərbaycan Qida Təhlükəsizliyi Agentliyinin (AQTA) verdiyi rəsmi məlumata görə, Ağdam, Cəbrayıl, Füzuli və Laçın rayonlarında qurbanlıq heyvanların satışı və kəsimi xidmətləri yüksək səviyyədə təşkil edilib.
Vətəndaşların rahatlığını təmin etmək üçün həmin rayonların strateji nöqtələrində xüsusi kəsim-satış məntəqələri və xüsusi təyinatlı səyyar çadırlar quraşdırılıb.
Həm stasionar məntəqələrdə, həm də qurulan səyyar çadırlarda qida təhlükəsizliyi və sanitar-gigiyenik normativlər ciddi şəkildə qorunur. Prosesin tam gigiyenik mühitdə baş tutması üçün bütün məntəqələr fasiləsiz təmiz su xətləri ilə təmin olunub.
Əhaliyə təqdim edilən hər bir heyvan ilkin olaraq baytarlıq baxışından keçirilir. Yalnız sanitar tələblərə tam cavab verən, sağlam heyvanların kəsilməsinə və satışına icazə verilir.
Builki tədbirlərin ən diqqətçəkən məqamı azad edilmiş rayonlardakı kəsim çadırlarında müasir texnoloji imkanların tətbiqidir. Müasir standartlar əsasında qurulmuş heyvan kəsimi çadırlarında Azərbaycan Qida Təhlükəsizliyi İnstitutunun (AQTİ) səyyar laboratoriyaları yerləşdirilib. Heyvanlarda hər hansı bir xəstəlik şübhəsi yaranarsa, daxili orqanlardan anındaca nümunələr götürülərək yerindəcə operativ şəkildə laborator müayinədən keçiriləcək.
Bayram günlərində əhalinin sağlamlığının qorunması məqsədilə AQTA-nın Mərkəzi Aparatının regional bölmələri, eləcə də institutun mütəxəssisləri gücləndirilmiş iş rejimində çalışırlar.
