İsveç avtomobil nəhəngi Volvo Cars qlobal birjalarda böyük canlanma ilə üzbəüz qalıb. Bui gün keçirilən birja ticarətində şirkətin səhmləri 6%-dən çox dəyər qazanaraq son üç ayın ən yüksək səviyyəsinə çatıb.
İnvestorların aktivliyini artıran əsas səbəb ABŞ hökumətinin şirkətə tətbiq edilən yeni milli təhlükəsizlik qaydalarına baxmayaraq, bağlı (connected) avtomobillərin Amerika bazarına idxalını və satışını davam etdirmək üçün rəsmi icazə (xüsusi lisenziya) verməsi olub. Bu qərar, Volvo Cars-ın Çin mənşəli Geely qrupuna məxsus olması səbəbindən yaranan bazardan kənarlaşdırılma riskini tamamilə aradan qaldırıb.
Sözügedən icazə rəsmi Vaşinqtonun fəaliyyətə başlayan “İnformasiya və kommunikasiya texnologiyaları təchizat zəncirinin təhlükəsizliyi: bağlı avtomobillər” adlı yeni sərt tənzimləmə qaydası çərçivəsində verilib. Çin proqram təminatı və texnologiyalarından istifadə edən nəqliyyat vasitələrinin yoxlanılmasını nəzərdə tutan bu qayda hər bir şirkət üzrə fərdi qiymətləndirmə tələb edir.
ABŞ-ın İnformasiya və Kommunikasiya Texnologiyaları və Xidmətləri İdarəsi ilə Volvo Car USA arasında aparılan gərgin danışıqlarda brendin korporativ idarəetmə prinsipləri, tətbiq etdiyi texnoloji həllər və istifadəçi məlumatlarının qorunması sistemləri ətraflı təhlil edilib. Yüksək təhlükəsizlik standartlarına əməl olunduğu təsdiqləndikdən sonra Ticarət Nazirliyi Volvo-ya ABŞ daxilində fəaliyyətini tam həcmdə davam etdirməyə rəsmən icazə verib.
ABŞ bazarı Volvo Cars üçün qlobal miqyasda ən strateji və böyük satış platformalarından biri hesab olunur. Ötən il ölkədə fəaliyyətinin 70 illik yubileyini qeyd edən brend Amerika iqtisadiyyatında böyük çəkiyə malikdir.
Şirkətin Çarlston şəhərində fəaliyyət göstərən nəhəng müəssisəsinə indiyədək 1,3 milyard dollardan çox birbaşa investisiya yatırılıb və burada 2 000-dən çox yerli mütəxəssis çalışır. Şirkətin planlarına əsasən, 2030-cu ilə qədər bu zavodda daha iki yeni avtomobil modelinin (o cümlədən yeni hibrid modelinin) istehsalına başlanılacaq. Şirkətin Nyu-Cersidəki baş qərargahında və digər regional ofislərində 600-ə yaxın korporativ işçi fəaliyyət göstərir. ABŞ-ın 48 ştatını əhatə edən 281 diler mərkəzi vasitəsilə ümumilikdə 11 500-dən çox insan məşğulluqla təmin olunub.
Analitiklərin fikrincə, ABŞ-dan alınan bu strateji təsdiq Volvo Cars-a Amerika bazarındakı uzunmüddətli inkişaf və satış hədəflərini heç bir maneə olmadan həyata keçirməyə tam zəmanət verir.
MONETAR.AZ
