Boeing şirkəti 737 MAX təyyarələrində ikinci dövrəyə getdikdən sonra eniş zamanı avtomatik naviqasiya funksiyasını söndürə bilən proqram xətası aşkar edib. “The Wall Street Journal”ın məlumatına görə, məsələ ilə bağlı ABŞ Federal Aviasiya Administrasiyası (FAA) araşdırmaya başlayıb.
Qüsurun kabin proqram təminatının yenilənməsindən sonra müəyyən edildiyi bildirilir. Problem pilotların ikinci dövrəyə getdikdən sonra əvvəlcədən müəyyən edilmiş uçuş marşrutunu dəyişməsi zamanı ortaya çıxa bilər.
Müəyyən şəraitdə bu nasazlıq təyyarənin aşağı hündürlükdə uçuşunun avtopilotun bəzi funksiyaları olmadan, pilotların birbaşa idarəetməsi ilə davam etdirilməsinə səbəb ola bilər.
Boeing avqustun sonunda 737 MAX operatorlarını problem barədə məlumatlandırıb. Şirkət aviaşirkətlərə göndərdiyi bildirişdə nasazlığın təhlükəsizlik üçün birbaşa risk yaratmadığını qeyd edib.
Şirkət hazırda proqram təminatına düzəliş hazırlayır. Ehtiyac yarandığı halda pilotların avtomatik naviqasiya funksiyasını bərpa etməsinə imkan verəcək prosedurun da hazırlanması nəzərdə tutulur.
Məsələ artıq bəzi aviaşirkətlərin yeni təyyarələrin qəbuluna münasibətinə də təsir edib. WSJ-nin sahə nümayəndələrinə istinadən yazdığına görə, “Southwest Airlines” və “United Airlines” Boeing-dən sözügedən proqram təminatı ilə təchiz edilmiş yeni 737 MAX təyyarələrinin çatdırılmamasını və əvvəlki proqram versiyasından istifadə olunmasını istəyiblər.
FAA isə məsələni araşdırdığını və zərurət yaranacağı təqdirdə müvafiq tədbirlər görəcəyini açıqlayıb.
Boeing-in bildirdiyinə görə, şirkət proqram təminatındakı qüsurdan 2024-cü ilin noyabrında xəbərdar olub. İlkin qiymətləndirmədə problemin təhlükəsizlik yoxlamasının aparılması üçün müəyyən edilmiş meyarlara cavab vermədiyi qənaətinə gəlinib. Lakin aviaşirkətlərdən əlavə məlumatlar daxil olduqdan sonra Boeing rəsmi araşdırmaya başlayıb və nəticələri FAA ilə bölüşüb.
Şirkət əvvəlcə 2028-ci ilin əvvəlinə planlaşdırılan daimi proqram düzəlişinin tətbiqini sürətləndirməyə çalışır. Bununla yanaşı, problemin 737 MAX 10-un sertifikatlaşdırılması və MAX 7-nin bazara çıxarılması proseslərinə təsir göstərə biləcəyi bildirilir.
Hazırda bu proqram təminatı ilə neçə 737 MAX təyyarəsinin istismarda olduğu isə məlum deyil.
Beləliklə, proqram təminatında aşkarlanan problem Boeing üçün həm texniki düzəliş, həm də yeni 737 MAX modellərinin sertifikatlaşdırılması baxımından əlavə araşdırma və nəzarət mərhələsi yaradıb.
MONETAR.AZ
