“Windows” əməliyyat sisteminin dünya üzrə geniş yayılması Microsoft üçün istifadəçilərin fərqli gözləntilərini qarşılamağı çətinləşdirir. Şirkətin dizayn üzrə vitse-prezidenti Diyeqo Baka bildirib ki, bir milyarddan çox istifadəçisi olan platformada hər kəsi eyni dərəcədə məmnun etmək mümkün deyil.
“Windows Latest” nəşrinin məlumatına görə, Bakının açıqlaması sosial şəbəkələrdə “Windows 11”in yenilənmiş “Başla” (Start) menyusuna yönələn tənqidlərdən sonra səsləndirilib. İstifadəçilərdən biri yeni menyunu sərt tənqid edərək əməliyyat sisteminin istehlakçılar arasında populyar olmadığını iddia edib.
Microsoft nümayəndəsi isə vurğulayıb ki, bu qədər böyük auditoriya üçün məhsul hazırlayarkən istifadəçilərin fərqli üstünlüklərini və iş vərdişlərini nəzərə almaq ciddi çətinlik yaradır.
“Bir milyarddan çox insan üçün əməliyyat sistemi layihələndirərkən qarşılaşdığımız ən böyük çətinliklərdən biri məhz budur. Çünki hər bir istifadəçinin fərqli üstünlükləri və fərdi iş vərdişləri var”, — deyə Diyeqo Baka bildirib.
Microsoft istifadəçi məmnuniyyətini artırmaq üçün “Windows 11”in məhsuldarlığını, ümumi keyfiyyətini və fərdiləşdirmə imkanlarını təkmilləşdirməyə çalışır. Şirkətin məqsədi istifadəçilərə əməliyyat sisteminin interfeysini şəxsi ehtiyaclarına və seçimlərinə uyğunlaşdırmaq imkanı yaratmaqdır.
Bununla belə, “Başla” menyusundakı “Tövsiyə olunur” (Recommended) bölməsi mübahisəli funksiyalardan biri olaraq qalır. Microsoft bu bölməni son istifadə edilən fayl və proqramlara daha sürətli çıxış təmin etmək üçün hazırlayıb. Lakin bəzi istifadəçilər funksiyanın interfeysdə yer almasına etiraz edir və tövsiyələri tamamilə söndürmək üçün daha sadə idarəetmə imkanları tələb edirlər.
“Windows 11”lə bağlı tənqidlər yalnız interfeyslə məhdudlaşmır. “How-To Geek” texnoloji nəşrinin jurnalistləri də əməliyyat sistemində kompüterin resurslarından istifadə edən və müəyyən hallarda onun işinə təsir göstərə bilən arxa fon xidmətlərinə diqqət çəkiblər.
Bu xidmətlər sırasında faylların axtarışını sürətləndirmək üçün indeksləmə aparan Windows Search, uzaqdan qoşulma imkanlarını təmin edən Remote Desktop Services, eləcə də bəzi telemetriya və avtomatik fon prosesləri göstərilir.
Qeyd edək ki, bu xidmətlərin mövcudluğu özlüyündə kompüterin mütləq yavaş işləməsi demək deyil. Onların sistemə təsiri cihazın texniki göstəricilərindən, xidmətlərin aktivliyindən və istifadə ssenarisindən asılı ola bilər.
“Windows 11” ətrafında müzakirələr Microsoft-un qarşısında iki əsas vəzifə qoyur: geniş istifadəçi auditoriyasının fərqli ehtiyaclarını nəzərə almaq və əməliyyat sisteminin funksionallığı ilə sadə, rahat istifadə təcrübəsi arasında tarazlıq yaratmaq.
MONETAR.AZ
