ABŞ hökuməti "Nvidia" şirkətinin süni intellekt çiplərinin Çinə qanunsuz şəkildə çatdırılması şübhəsi ilə Sinqapurda fəaliyyət göstərən "Apex Logistics" logistika şirkətinə qarşı araşdırmaya başlayıb. "Bloomberg"in məlumatına görə, bu, ABŞ hakimiyyətinin yarımkeçiricilərin qanunsuz ticarətində mümkün iştirakına görə yükdaşıma şirkətini məsuliyyətə cəlb etməyə çalışdığı ilk hal ola bilər.
Məlumatlı mənbələrə istinadən bildirilir ki, ABŞ rəsmiləri "Apex Logistics"in "Super Micro Computer" istehsalı olan süni intellekt sistemlərini ABŞ-nin ixrac məhdudiyyətlərini pozaraq daşıyıb-daşımadığını araşdırırlar.
Araşdırmanı ABŞ Ticarət Nazirliyinin Sənaye və Təhlükəsizlik Bürosu (Bureau of Industry and Security – BIS) aparır.
İstintaq əsasən 2024-cü ildə həyata keçirilmiş göndərişləri əhatə edir. Araşdırma, qabaqcıl süni intellekt avadanlıqlarının Çinə ixracına tətbiq olunan ABŞ məhdudiyyətlərindən yayınmaq üçün qurulduğu ehtimal edilən təchizat zəncirlərində logistika şirkətlərinin mümkün rolunu üzə çıxarmağı hədəfləyir. ABŞ milli təhlükəsizlik səbəblərini əsas gətirərək 2022-ci ildən etibarən bu kateqoriyaya aid çiplərin Çinə ixracına ciddi məhdudiyyətlər tətbiq edib.
"Apex Logistics" bəyan edib ki, ABŞ tərəfinin az sayda göndərişlə bağlı narahatlığından xəbərdardır və istintaqla tam əməkdaşlıq edir. "Bloomberg"in məlumatına görə, şirkətin İsveçrədə yerləşən ana şirkəti "Kuehne + Nagel" də törəmə müəssisəsinin səlahiyyətli orqanlarla əməkdaşlıq etdiyini, lakin özünün istintaq qurumlarından hər hansı rəsmi sorğu almadığını açıqlayıb.
Məlumata əsasən, araşdırma "Apex Logistics"in 47 göndərişini əhatə edir. Ehtimal olunan marşrutlara Tayvanda "Nvidia" çipləri əsasında istehsal edilmiş serverlərin əvvəlcə ABŞ-yə, daha sonra Cənub-Şərqi Asiya və Honq Konqa, oradan isə materik Çinə göndərilməsi daxildir.
"Nvidia" isə bildirib ki, məhsullarının ixrac nəzarəti qaydalarına uyğun şəkildə satılmasını təmin etmək üçün yalnız yoxlanılmış tərəfdaşlarla əməkdaşlıq edir. Şirkətin sözlərinə görə, tətbiq olunan yoxlama prosedurları ABŞ-nin ixrac qaydalarından yayınmaq cəhdlərinin aşkar edilməsinə imkan verir.
MONETAR.AZ
