Süni intellekt və avtomobil sənayesinin iki nəhəngi olan Nvidia və Hyundai Motor Group, Cənubi Koreya hökumətinin də dəstəyi ilə ölkədə irimiqyaslı süni intellekt (AI) tədqiqat və tədarük mərkəzinin yaradılması üzrə yekun danışıqlar mərhələsinə qədəm qoyublar. Korea Economic Daily nəşrinin hökumət və sənaye mənbələrinə istinadən verdiyi məlumata görə, bu layihə regionda texnoloji ekosistemi tamamilə yenidən formalaşdıracaq.
Mərkəzin yerləşdirilməsi üçün əsas namizəd kimi Cənubi Koreyanın cənub-qərb sahilində yerləşən, hökumət tərəfindən idarə olunan Saemangeum sahilyanı inkişaf zonası seçilib. Bu seçim təsadüfi deyil. Hyundai Motor Group artıq Saemangeum regionuna robototexnika, intellektual zavodlar və yaşıl enerji ekosistemini əhatə edən 9 trilyon von (təxminən 6.26 milyard ABŞ dolları) həcmində investisiya paketi ayırıb. Bu investisiyanın 5.8 trilyon vonluq hissəsi birbaşa avtonom idarəetmə və robotlar üçün xidmət edəcək nəhəng AI məlumat mərkəzinin tikintisinə yönəldilib. Tikintinin 2027-ci ildə başlanması və 2029-cu ildə yekunlaşması planlaşdırılır.
Yeni mərkəz Nvidia-nın Sinqapur və Tayvandakı mövcud mərkəzləri ilə analoji strukturda fəaliyyət göstərəcək, lakin Cənubi Koreyadakı mərkəzin spesifik bir fokus nöqtəsi olacaq. Süni intellekt proqram təminatının virtual mühitdən çıxaraq real dünya obyektlərinə — avtonom nəqliyyat vasitələrinə, ağıllı fabriklərə və insanabənzər (humanoid) robotlara inteqrasiya edilməsidir.
Bu layihə tərəflərin 2025-ci ilin oktyabrında imzaladıqları əməkdaşlıq memorandumunun (MOU) praktiki icrasıdır. Razılaşmanın əsas detalları:
-
Prosessor tədarükü: Nvidia, Hyundai-nin AI modellərini məşq etdirmək, sınaqdan keçirmək və tətbiq etmək üçün 50,000 ədəd ən son nəsil Blackwell GPU (qrafik prosessor) tədarük edəcək.
-
Məlumat mübadiləsi: Nvidia bazarda apparat (hardware) təminatçısı kimi lider olsa da, real sənaye və istehsalat məlumatlarına ehtiyacı var. Hyundai öz zavodlarının daxili istehsalat və robototexnika datalarını Nvidia-nın alqoritmləri üçün əlçatan edəcək.
Nvidia-nın baş icraçı direktoru (CEO) Jensen Huang bu həftə rəsmi Seul səfərinə hazırlaşır. Cümə günü (5 iyun) onun Hyundai İdarə Heyətinin sədri Euisun Chung ilə təkbətək görüşü və layihənin son detallarını qətiləşdirməsi gözlənilir.
Lakin Nvidia rəhbərinin gündəliyi təkcə Hyundai ilə məhdudlaşmır. Cənubi Koreya Nvidia üçün yarımkeçirici (HBM yaddaş çipləri) və sənaye tərəfdaşlığı baxımından kritik regiondur. Səfər çərçivəsində onun ölkənin digər nəhənglərinin rəhbərləri — SK Group (Chey Tae-won), LG Group (Koo Kwang-mo), Naver (Lee Hae-jin) və robototexnika sahəsində aktiv olan Doosan Group rəhbərliyi ilə də strateji müzakirələr aparacağı təsdiqlənib.
Bu layihə daxili avtonom idarəetmə texnologiyalarında qlobal rəqiblərindən (Tesla və Çin istehsalçıları) geri qalan Hyundai üçün böyük bir sıçrayış şansıdır. Şirkət Nvidia-nın Alpamayo avtonom idarəetmə platformasından və törəmə müəssisəsi olan Boston Dynamics şirkətinin sənaye təyinatlı humanoid robotlarından (məsələn, yeni Atlas modeli) istifadə edərək rəqabətdə önə çıxmağı hədəfləyir. Cənubi Koreya isə bu mərkəz sayəsində qlobal süni intellekt infrastruktur xəritəsində mütləq mərkəzlərdən birinə çevriləcək.
MONETAR.AZ
