Dövlət Statistika Komitəsinin məlumatları əsasında ölkədə muzdla çalışan işçilərin sosial rifahının göstəricisi olan orta aylıq əməkhaqqı üzrə cari ilin ilk iki ayının nəticələri açıqlanıb. 2026-cı ilin yanvar-fevral aylarında ölkə üzrə orta aylıq nominal əməkhaqqı ötən ilin müvafiq dövrü ilə müqayisədə 5,3 faiz artaraq 1099,1 manat təşkil edib.
İqtisadiyyatın müxtəlif sahələri üzrə aparılan təhlillər göstərir ki, neft-qaz sektorunda çalışanların əməkhaqqı digər sahələri xeyli qabaqlayaraq 4006,8 manat səviyyəsində qərarlaşıb. Qeyri neft-qaz sektorunda isə bu göstərici 1046,5 manat olub. Mülkiyyət növləri üzrə fərqlərə nəzər saldıqda məlum olur ki, özəl müəssisələrdə çalışanların orta aylıq əməkhaqqı 1126,7 manat təşkil edərək, dövlət müəssisələrindəki müvafiq göstəricini (1070,8 manat) üstələyib.
İqtisadi fəaliyyət növləri üzrə ən yüksək gəlirlər mədənçıxarma sənayesi, maliyyə və sığorta fəaliyyəti, eləcə də informasiya və rabitə sahələrində müşahidə olunur. Mədənçıxarma sənayesində orta aylıq əməkhaqqı 3782,1 manat, maliyyə və sığorta sektorunda 2790,0 manat, informasiya və rabitə sahəsində isə 1915,5 manat təşkil edib. Eyni zamanda peşə, elmi və texniki fəaliyyət sahəsində çalışanlar orta hesabla 1786,0 manat, nəqliyyat və anbar təsərrüfatı işçiləri isə 1497,8 manat əməkhaqqı alırlar.
Buna baxmayaraq, bəzi sahələrdə əməkhaqqı göstəriciləri ölkə üzrə orta rəqəmdən aşağı qalıb. Ən aşağı əməkhaqqı kənd təsərrüfatı, meşə təsərrüfatı və balıqçılıq sahəsində qeydə alınıb ki, burada orta aylıq gəlir 684,9 manatdır. Həmçinin su təchizatı və tullantıların təmizlənməsi (722,4 manat), ticarət və nəqliyyat vasitələrinin təmiri (763,5 manat), eləcə də inzibati və yardımçı xidmətlərin göstərilməsi (764,1 manat) sahələrində də nisbətən aşağı göstəricilər qeydə alınıb.
Mülkiyyət formaları arasındakı maraqlı təzadlar bəzi spesifik sahələrdə daha qabarıq görünür. Məsələn, maliyyə və sığorta fəaliyyətində dövlət sektorunda çalışanların əməkhaqqı 3420,5 manat olduğu halda, özəl sektorda bu rəqəm 2645,7 manat təşkil edir. Əksinə, peşə, elmi və texniki fəaliyyət sahəsində özəl sektor (2151,6 manat) dövlət sektorunu (1350,7 manat) əhəmiyyətli dərəcədə qabaqlayır. Bu rəqəmlər ölkə iqtisadiyyatının müxtəlif seqmentlərində əmək bazarının dinamik inkişafını və sahələr üzrə ixtisaslaşmış kadr potensialına olan tələbatın əməkhaqqı səviyyəsinə birbaşa təsirini nümayiş etdirir.
MONETAR.AZ
