2025–2026 mövsümündə dünyanın ən yüksək qazanan idmançıları siyahısı açıqlanıb. Forbes məlumatlarına əsaslanan göstəricilərə görə, idman dünyasında gəlirlər həm maaş, həm də reklam və kommersiya müqavilələri hesabına rekord səviyyəyə çatıb.
Siyahıya əsasən, portuqaliyalı futbolçu Kristiano Ronaldo 300 milyon dollar gəlirlə birinci yerdə qərarlaşıb. Onun gəlirinin 235 milyon dolları meydandakı çıxışlardan, 65 milyon dolları isə sponsorluq və kommersiya müqavilələrindən formalaşıb. Bu göstərici onu ən yaxın rəqibindən təxminən 130 milyon dollar irəli çıxarır.
İkinci yerdə meksikalı boksçu Saul Alvarez 170 milyon dollarla yer alır. Onun gəlirlərinin böyük hissəsi döyüşlərdən əldə olunub.
Üçüncü sırada isə argentinalı ulduz Lionel Messi 140 milyon dollar gəlirlə qərarlaşıb. Messi gəlirinin təxminən yarısını meydandakı çıxışlardan, yarısını isə reklam və kommersiya fəaliyyətlərindən qazanır.
Siyahıda dördüncü yerdə ABŞ-li basketbolçu LeBron James (137,8 milyon dollar), beşinci yerdə isə beysbolçu Shohei Ohtani (127,6 milyon dollar) yer alır. Xüsusilə Ohtaninin gəlirlərinin böyük hissəsi sponsorluqlardan formalaşır.
Altıncıdan onuncu yerə qədər isə Stephen Curry, Jon Rahm, Kərim Benzema, Kevin Durant və Luis Hamilton kimi dünya şöhrətli idmançılar daxil olub.
Məlumatlar göstərir ki, futbol və basketbol idmançıları siyahıda üstünlük təşkil edir. İlk onluqda üç futbolçu və üç basketbolçu yer alır.
Ekspertlərin fikrincə, idmançılar arasında gəlir fərqləri həm idman növündən, həm də kommersiya imkanlarından asılı olaraq dəyişir. Futbol və basketbol ulduzları daha çox sponsorluq gəlirləri əldə etdiyi halda, boks və qolf kimi idman növlərində əsas gəlir yarış mükafatlarından formalaşır.
Mütəxəssislər bildirirlər ki, qlobal idman bazarında brend dəyəri və kommersiya əməkdaşlıqları idmançıların ümumi gəlirlərində getdikcə daha böyük rol oynayır.
MONETAR.AZ
