Dünyada artan geosiyasi gərginlik və səyahət xərclərinin yüksəlməsi insanların istirahət planlarına mənfi təsir göstərir. Yeni araşdırma göstərir ki, beynəlxalq münaqişələr və bahalaşma bir çox ölkələrdə turistlərin istiqamət seçimlərini dəyişməsinə səbəb olur.
Statista Consumer Insights tərəfindən 2026-cı ilin ilk yarısında aparılan sorğunun nəticələrinə görə, respondentlərin əksəriyyəti beynəlxalq münaqişələrin səyahət edəcəkləri ölkənin seçiminə təsir etdiyini bildirib. Bu göstərici Böyük Britaniyada 65 faiz, Almaniyada 61 faiz, ABŞ-da isə 55 faiz təşkil edib.
Sorğu həmçinin göstərib ki, artan qiymətlər də insanların səyahət qərarlarına ciddi təsir göstərir. ABŞ, Böyük Britaniya və Almaniyada respondentlərin təxminən 45-47 faizi son dövrlərdə yüksək xərclər səbəbindən səyahət və ya yerləşmə xidmətləri bron edə bilmədiklərini qeyd ediblər.
Ekspertlər bahalaşmanın əsas səbəbləri kimi yanacaq qiymətlərinin yüksəlməsini və Yaxın Şərqdə davam edən qeyri-sabitliyi göstərirlər. Bu amillər həm avtomobillə səyahətlərin, həm də aviareyslərin maya dəyərini artırır, eyni zamanda beynəlxalq səfərlərlə bağlı qeyri-müəyyənliyi gücləndirir.
Mövcud şəraitdə bir çox turist uzaq istiqamətlər əvəzinə daha yaxın və ya ölkədaxili məkanlara üstünlük verir. Digərləri isə səyahət planlarını təxirə salır və ya büdcələrini nəzərə alaraq daha qənaətli seçimlərə yönəlirlər.
Mütəxəssislərin fikrincə, geosiyasi risklərin və qiymət təzyiqlərinin davam etməsi qlobal turizm sektorunda istehlakçı davranışlarına təsir göstərən əsas amillərdən biri olaraq qalacaq.
MONETAR.AZ
