Bu gün Asiya valyutaları əsasən möhkəmlənib, ABŞ dolları isə son ayların ən aşağı səviyyələri yaxınlığında qalmaqda davam edib. ABŞ dövlət istiqrazlarının gəlirliliyinin geriləməsi regional valyutalara dəstək versə də, bazar iştirakçıları Federal Ehtiyat Sisteminin (FED) son iclasının protokollarının açıqlanmasını gözləyərək ehtiyatlı mövqe sərgiləyirlər.
Ticarət zamanı ABŞ dollarının əsas valyutalara nisbətdə dəyərini ölçən indeks 0,1 faiz azalaraq 99,57 bəndə enib. Beləliklə, indeks iyunun əvvəlindən bəri qeydə alınan ən aşağı səviyyələrdə qalır.
ABŞ istiqrazlarının gəlirliliyində müşahidə olunan eniş də investorların riskli aktivlərə marağını qismən artırıb. Ölkənin 10 illik xəzinə istiqrazlarının gəlirliliyi 4,702 faizə, 30 illik istiqrazların gəlirliliyi isə 5,282 faizə geriləyib. Bu isə son həftələr inkişaf etməkdə olan bazarlara təzyiq göstərən amillərin zəiflədiyini göstərir.
Bazarın diqqəti indi FED-in iyul iclasının protokollarına yönəlib. İnvestorlar sənəd vasitəsilə tənzimləyicinin faiz dərəcələrini uzun müddət yüksək səviyyədə saxlayacağı və ya ilin sonunadək əlavə faiz artımına gedəcəyi ilə bağlı siqnallar axtarırlar.
Xatırladaq ki, FED iyulun 29-da keçirilən iclasında baza faiz dərəcəsini 3,50–3,75 faiz diapazonunda sabit saxlayıb. Qərarın 9 səsə qarşı 3 səslə qəbul olunması isə qurum daxilində pul siyasətinin gələcək istiqaməti ilə bağlı fərqli yanaşmaların mövcud olduğunu göstərib.
ABŞ-da inflyasiyanın gözləntilərdən zəif olması və iyul ayında məşğulluq göstəricilərinin pisləşməsi dollar üzərində təzyiq yaradıb. Bu məlumatlar bazarlarda növbəti faiz artımının ehtimalını zəiflədib və dolların mövqeyini sarsıdıb.
Dolların zəifləməsi Asiya valyutalarına dəstək versə də, yüksək neft qiymətləri və Yaxın Şərqdə davam edən geosiyasi gərginlik region valyutalarının daha sürətli bahalaşmasının qarşısını alır. "Brent" markalı neftin qiyməti bir barel üçün 91 dollardan yuxarı qalmaqda davam edir ki, bu da enerji idxalçısı olan ölkələrdə inflyasiya risklərini artırır.
Valyuta bazarında ən diqqətçəkən artım Cənubi Koreya vonunda qeydə alınıb. USD/KRW məzənnəsi təxminən 1 faiz azalaraq 2025-ci ilin sentyabrından bəri ən aşağı səviyyəyə enib. Bu isə vonun son bir ilin ən yüksək məzənnəsinə yüksəlməsi deməkdir.
Yapon yeni də qismən möhkəmlənib. USD/JPY məzənnəsi 0,2 faiz azalaraq 159,35 səviyyəsinə düşsə də, analitiklər hesab edirlər ki, ABŞ və Yaponiya hakimiyyət orqanlarının son valyuta müdaxilələrinə baxmayaraq, yen hələ də təzyiq altındadır.
Çin yuanı ABŞ dollarına nisbətdə demək olar ki, dəyişməz qalıb. Sinqapur dolları cüzi möhkəmlənərkən, Avstraliya dolları isə ABŞ valyutasına qarşı 0,3 faiz dəyər itirib.
Hindistan rupisi isə eniş trendini davam etdirib. USD/INR məzənnəsi 0,1 faiz artaraq 95,74 rupiyə yüksəlib və bununla da rupi ardıcıl beşinci ticarət sessiyasında zəifləyib. Analitiklər bildirirlər ki, Hindistan Mərkəzi Bankının mümkün müdaxilələrinə dair xəbərlərə baxmayaraq, yüksək neft qiymətləri və qlobal istiqraz gəlirliliyinin səviyyəsi milli valyutaya təzyiq göstərməkdə davam edir.
MUFG bankının analitikləri hesab edirlər ki, avqust ayında müşahidə olunan dinamika investorların Asiya valyutalarına münasibətdə daha seçici davrandığını göstərir. Onların fikrincə, ən güclü yüksəliş Cənubi Koreya vonu və Tayvan dollarında müşahidə olunur. Bu tendensiya bazar iştirakçılarının ABŞ-da pul siyasətinin yumşalacağına dair gözləntiləri və qlobal texnologiya sektorunun inkişafından faydalanan valyutalara üstünlük verməsi ilə əlaqələndirilir.
MONETAR.AZ
