Bitcoin bu gün 63 min ABŞ dollarından aşağı səviyyədə ticarət olunmağa davam edib. ABŞ fond bazarlarında nikbin əhval-ruhiyyənin qorunmasına baxmayaraq, korporativ satışlar, tənzimləmə sahəsində qeyri-müəyyənlik və zəifləyən texniki göstəricilər kriptovalyuta bazarında yüksəlişi məhdudlaşdırıb.
Dünyanın ən böyük kriptovalyutası Bakı vaxtı ilə saat 14:07-yə olan məlumata görə 0,3% bahalaşaraq 62 992,8 dollar səviyyəsində ticarət olunub. Gün ərzində qiymət qısa müddət ərzində 63 165 dollara qədər yüksəlsə də, bu səviyyədə möhkəmlənə bilməyib. Analitiklər hesab edirlər ki, Bitkoinin ABŞ səhmləri ilə birlikdə yeni rekordlara yüksəlməməsi ümumi risk iştahının azalmasından deyil, məhz kriptovalyuta bazarına xas amillərdən qaynaqlanır.
"Blockonomi"nin məlumatına görə, Bitkoinin ən böyük korporativ sahibi olan "Strategy" təxminən 108,6 milyon dollar dəyərində 1 690 BTC satıb. Bazara əlavə təklifin daxil olması qiymətin bərpasını çətinləşdirən əsas amillərdən biri kimi qiymətləndirilir.
Bazar əhval-ruhiyyəsinə ABŞ Qiymətli Kağızlar və Birja Komissiyasının (SEC) innovativ tokenləşdirmə layihələri üçün nəzərdə tutulan tənzimləyici güzəştlərin tətbiqini təxirə salması da mənfi təsir göstərib. Bu qərar blokçeyn əsaslı yeni maliyyə məhsullarının bazara çıxışı ilə bağlı qeyri-müəyyənliyi uzadıb.
Texniki analitiklər 63 220 dollar səviyyəsini əsas həftəlik müqavimət kimi qiymətləndirirlər. Onların fikrincə, qiymətin bu həddən aşağı bağlanması əvvəlki dəstək zonasını müqavimətə çevirə və Bitkoin üçün əlavə eniş riskləri yarada bilər. İnvestorların diqqəti, həmçinin, avqustun 26-da açıqlanacaq ABŞ-da istehlak xərcləri inflyasiyası (PCE) göstəricilərinə yönəlib. Həmin məlumatların Federal Ehtiyat Sisteminin növbəti faiz qərarları ilə bağlı gözləntilərə təsir göstərəcəyi hesab olunur.
Bununla yanaşı, uzunmüddətli perspektivdə bazarda müsbət siqnallar da qalır. "Grayscale" bildirib ki, artan dövlət borcu, blokçeyn texnologiyasının daha geniş tətbiqi və gənc investorların portfel seçimlərindəki dəyişikliklər Bitkoinə marağı uzunmüddətli dövrdə dəstəkləyə bilər.
Şirkətin qiymətləndirməsinə görə, yüksək dövlət kəsirləri məhdud təklifə malik aktivlərə tələbatı artırmağa davam edə bilər. Bundan əlavə, tokenləşdirilmiş qiymətli kağızların, steyblkoinlərin və tənzimlənən kriptoinvestisiya məhsullarının inkişafı rəqəmsal aktivlərlə ənənəvi maliyyə sistemi arasında inteqrasiyanı daha da gücləndirə bilər.
MONETAR.AZ
