Rusiyada dondurulmuş hazır yeməklər və yarımfabrikatlara tələbat sürətlə artır. Mütəxəssislər bunu istehlakçı vərdişlərinin dəyişməsi, hazır qida bazarının genişlənməsi və pərakəndə satış şəbəkələrində çeşidlərin artması ilə əlaqələndirirlər.
Analitik şirkət NTech-in məlumatına görə, 2026-cı ilin birinci rübündə dondurulmuş yarımfabrikatlar, tərəvəz və meyvələr, eləcə də hazır qidaların satışı ötən ilin eyni dövrü ilə müqayisədə həcm ifadəsində 8 faiz, dəyər ifadəsində isə 16 faiz artıb.
Ən yüksək artım xəmir məhsulları, dondurulmuş göyərti və hazır dondurulmuş qida seqmentində qeydə alınıb. Xüsusilə balıq qəlyanaltıları, tərəvəzli panirli qəlyanaltılar, hazır hot-doqlar və pendirli qəlyanaltıların satışında kəskin yüksəliş müşahidə olunub.
Ekspertlərin fikrincə, alıcılar vaxta qənaət etməyə imkan verən məhsullara daha çox üstünlük verirlər. Eyni zamanda, dondurulmuş tərəvəz və giləmeyvələr sağlam qidalanma tendensiyasına uyğun hesab olunduğundan bu kateqoriyaya maraq da artır.
Pərakəndə satış şəbəkələri artan tələbi nəzərə alaraq dondurulmuş məhsulların çeşidini genişləndirir. Mağazaların formatından asılı olaraq bu kateqoriyada məhsul sayı 90-dan 1 400-dən çox ada qədər dəyişir. Hazır yemək və qarnir çeşidləri isə 40-dan 240 növə qədər çatır.
Mütəxəssislər hesab edirlər ki, müasir şok dondurma texnologiyaları məhsulların dadını, qida dəyərini və strukturunu qorumağa imkan verir ki, bu da istehlakçıların bu məhsullara marağını daha da artırır.
MONETAR.AZ
