Cənubi Koreyanın iki ən böyük yarımkeçirici istehsalçısı – Samsung Electronics və SK Hynix ABŞ-ın aparıcı texnologiya şirkətləri ilə milyardlarla dollar dəyərində yeni əməkdaşlıq sazişlərini elan etməyə hazırlaşırlar. Məlumatı Bloomberg agentliyi yayıb.
Məlumata görə, razılaşmalar Cənubi Koreya prezidenti Li Çje Myonun Silikon Vadisinə rəsmi səfəri çərçivəsində açıqlanacaq. Prezidentin siyasət məsələləri üzrə müşaviri Kim Yon Bom bildirib ki, sövdələşmələr "çox böyük" həcmdədir və iki ölkə arasında texnologiya əməkdaşlığının yeni mərhələsini formalaşdıra bilər.
Onun sözlərinə görə, paketə yaddaş çiplərinin uzunmüddətli tədarük müqavilələri, strateji investisiya tərəfdaşlıqları, eləcə də qarşılıqlı anlaşma memorandumları (MoU) daxil olacaq. Rəsmi bəyanatlar hələ açıqlanmadığından sazişlərin maliyyə həcmi barədə məlumat verilməyib.
Kim Yon Bom qeyd edib ki, prezidentin ABŞ səfəri Koreya şirkətləri ilə amerikalı tərəfdaşlar arasında uzun müddətdir davam edən danışıqların yekunlaşmasını sürətləndirən əsas amillərdən biri olub.
Prezident Li Çje Myon ABŞ səfərinə San-Fransiskodan başlayacaq. Səfər çərçivəsində o, süni intellekt mövzusuna həsr olunmuş beynəlxalq sammitdə iştirak edəcək və dünyanın aparıcı texnologiya liderləri ilə ikitərəfli görüşlər keçirəcək.
Görüş proqramına aşağıdakılar daxildir:
- Nvidia-nın baş icraçı direktoru Censen Huanq;
- OpenAI-nin baş icraçı direktoru Sem Altman;
- Anthropic-in baş icraçı direktoru Dario Amodei;
- Broadcom-un baş icraçı direktoru Hok Tan.
Süni intellekt sammitinə Cənubi Koreyanın aparıcı texnologiya və sənaye şirkətlərinin rəhbərləri də qatılacaqlar. Onların arasında:
- Samsung Electronics-in icraçı sədri Li Çje Yon;
- SK Group-un sədri Çey Te Von;
- Hyundai Motor-un icraçı sədri Çon Uy Son;
- Naver şirkətinin təsisçisi Li Xe Çjin yer alırlar.
Analitiklərin fikrincə, gözlənilən sazişlər qlobal süni intellekt infrastrukturuna tələbatın sürətlə artdığı dövrdə yaddaş çipləri bazarında Cənubi Koreya istehsalçılarının mövqeyini daha da gücləndirə və ABŞ texnologiya şirkətləri ilə strateji əməkdaşlığı yeni səviyyəyə qaldıra bilər.
MONETAR.AZ
