"Xiaomi" süni intellekt (Sİ) texnologiyaları ilə təchiz edilmiş məişət texnikası bazarında Çinin əsas qazanan şirkətlərindən birinə çevrilə bilər. "Morgan Stanley"in yeni hesabatına görə, şirkətin güclü ekosistemi, ağıllı ev həllərindəki mövqeyi və qlobal istifadəçi bazasının sürətlə genişlənməsi uzunmüddətli artım üçün mühüm üstünlüklər yaradır.
İnvestisiya bankı "Xiaomi" səhmləri üzrə "Overweight" ("bazardan yüksək") reytinqini və 45 Honkonq dolları hədəf qiymətini qüvvədə saxlayıb. Analitiklərin fikrincə, şirkət süni intellekt əsaslı məişət texnikası bazarının genişlənməsindən ən çox faydalanacaq texnologiya şirkətləri sırasında yer alır.
Hesabata əsasən, Çində AI dəstəkli məişət texnikası bazarının həcmi şəbəkəyə qoşulmuş cihazların sayının artması və orta satış qiymətlərinin yüksəlməsi hesabına hazırkı 123 milyard dollardan 2030-cu ilə qədər 150 milyard dollara çatacaq.
"Morgan Stanley" proqnozlaşdırır ki, "Xiaomi"nin yalnız daxili bazarda AI əsaslı məişət texnikası satışlarından əldə etdiyi illik gəlir 2035-ci ilə qədər 200 milyard yuanı ötəcək. Xarici bazarlardakı satışların isə bundan da yüksək gəlir potensialına malik olacağı bildirilir.
Analitiklər hesab edirlər ki, şirkətin əsas üstünlüyü vahid rəqəmsal ekosistemidir. "Xiaomi" smartfonlar, ağıllı saatlar və digər daşına bilən qurğular, televizorlar, məişət texnikası və elektromobilləri "HyperOS" platforması vasitəsilə bir-biri ilə inteqrasiya edir. Bu yanaşma istifadəçilərin eyni ekosistem daxilində daha çox məhsul seçməsinə və şirkətin hər müştəridən əldə etdiyi gəlirin artmasına şərait yaradır.
Hesabatda vurğulanır ki, 1 milyarddan çox şəbəkəyə qoşulmuş cihaz və davamlı artan aylıq aktiv istifadəçi bazası "Xiaomi"yə məhsulların çarpaz satışını (cross-selling) genişləndirmək və müştəri loyallığını gücləndirmək üçün əhəmiyyətli üstünlük verir.
Bankın qiymətləndirməsinə görə, şirkətin "İnsan + Avtomobil + Ev" strategiyası müxtəlif cihazlar arasında sinerji yaradaraq "Xiaomi"ni ənənəvi məişət texnikası istehsalçılarından fərqləndirəcək. Beynəlxalq bazarlara ekspansiya da uzunmüddətli gəlir artımının əsas mənbələrindən biri kimi qiymətləndirilir.
Analitiklər həmçinin bildirirlər ki, bazar hələ də "Xiaomi"nin süni intellekt sahəsindəki investisiyalarının potensialını tam qiymətləndirməyib. Şirkətin öz böyük dil modelləri (LLM), AI agentləri və proqram platformalarının inkişafı 2027–2028-ci illərdə mənfəətin daha sürətli artmasına və bazar dəyərinin yüksəlməsinə təkan verə bilər. Bu texnologiyalar məhsulların fərqləndirilməsini, premium qiymət strategiyasını və rentabelliyin yaxşılaşmasını dəstəkləyən əsas amillərdən biri hesab olunur.
Hesabatda qeyd olunur ki, yaddaş çiplərinin bahalaşması ilə bağlı qısamüddətli risklər idarəolunan səviyyədə qiymətləndirilir. Analitiklərin fikrincə, "Xiaomi" artıq qiymət siyasətinin yenilənməsi və məhsul portfelinin optimallaşdırılması kimi addımlarla artan istehsal xərclərinin mənfəətə mümkün təsirini məhdudlaşdırmağa çalışır.
MONETAR.AZ
