Çinin avtomobil istehsalçısı “Geely Automobile” 2026-cı ilin ilk yarısında gəlirlərini və əməliyyat göstəricilərini yaxşılaşdırsa da, valyuta itkiləri xalis mənfəətin azalmasına səbəb olub.
Şirkətin səhmdarlara aid xalis mənfəəti ötən ilin eyni dövründəki 9,26 milyard yuandan 9,09 milyard yuana düşüb. Bu, illik müqayisədə təxminən 2%-lik azalma deməkdir. Eyni zamanda, şirkətin gəlirləri 15% artaraq 173,6 milyard yuana yüksəlib.
“Geely”nin ümumi mənfəət marjası hesabat dövründə 1,6 faiz bəndi artaraq 17,9%-ə çatıb. Şirkət bu yaxşılaşmanı daha yüksək marjaya malik premium və ixrac avtomobillərinin satışının artması, istehsal miqyasının genişlənməsi və xərclərə nəzarətin gücləndirilməsi ilə əlaqələndirib.
Valyuta itkiləri və qiymətdən düşmə xərcləri nəticələrdən çıxarıldıqda isə mənzərə daha müsbətdir. Vergidən sonra qeydə alınan 550 milyon yuanlıq valyuta itkisi və digər müvafiq xərclər nəzərə alınmadan hesablanan baza mənfəət 46% artaraq 9,68 milyard yuana yüksəlib. Ötən ilin ilk yarısında bu göstərici 6,62 milyard yuan təşkil etmişdi.
Şirkətin Honq-Konq birjasında ticarət olunan səhmləri də maliyyə nəticələrinə müsbət reaksiya verib. Moskva vaxtı ilə saat 08:24-ə olan məlumata görə, səhmlər 22% bahalaşaraq 18,21 Honq-Konq dollarına çatıb.
Şirkət Çinin avtomobil bazarında rəqabətin kəskinləşdiyi bir vaxtda artım tempini qorumaq üçün elektrik avtomobillərinə və xarici bazarlarda mövqelərinin gücləndirilməsinə investisiyaları artırır.
“Geely” ikinci yarımildə “Galaxy” markası altında yeni modellər təqdim etməyə hazırlaşır. Bunlar arasında tam elektrikli “Galaxy TT” və şəbəkədən enerji yığan “Galaxy Zhanjian 700” hibridinin satışa çıxarılması planlaşdırılır. Şirkət eyni zamanda hibrid avtomobillərdən ibarət məhsul çeşidini də genişləndirəcək.
Qrupun premium markası “ZEEKR” də xarici bazarlara çıxışını genişləndirəcək. Şirkət “ZEEKR 9X” modelinin beynəlxalq satışlarına başlayacaq.
Bununla yanaşı, “Geely” Avropa və Malayziya da daxil olmaqla müxtəlif xarici bazarlarda yerli istehsal imkanlarının yaradılması və tərəfdaşlıqların inkişaf etdirilməsi üzərində işləyir. Şirkət bu strategiya ilə həm ixrac həcmlərini artırmağı, həm də qlobal bazarlarda daha dayanıqlı mövqe formalaşdırmağı hədəfləyir.
MONETAR.AZ
