ABŞ-da xam neft ehtiyatları 24 aprel tarixində başa çatan həftə ərzində 6,2 milyon barrel azalaraq 459,5 milyon barrelə düşüb. Bu barədə bugün ABŞ-ın Enerji İnformasiya Administrasiyası (EIA) məlumat yayıb.
Benzin ehtiyatları da 6,1 milyon barrel azalaraq 222,3 milyon barrel təşkil edib. Bu göstərici, Reuters sorğusuna əsasən, analitiklərin gözlədiyi 2,1 milyon barrel azalma proqnozunu xeyli üstələyib. Distillat ehtiyatları da həftə ərzində azalma göstərib.
Oklahomadakı Kaşinq paylama mərkəzində xam neft ehtiyatları 796 min barrel azalıb.
Ehtiyatlarla bağlı məlumatların açıqlanmasından sonra neft fyuçersləri yüksəlib: Brent markalı neft 5,59 dollar artaraq barrel üçün 116,85 dollara, West Texas Intermediate (WTI) isə 4,74 dollar artaraq barrel üçün 104,67 dollara çatıb (18:38 vəziyyətinə görə).
Neft emalı zavodlarında xam neft emal həcmi gündə 84 min barrel artıb, istehsal gücündən istifadə səviyyəsi isə həftə ərzində 0,5 faiz bəndi yüksəlib.
