Rusiya Baş nazirinin müavini Aleksandr Novak Moskva ilə Avropa İttifaqı (Aİ) arasında enerji münasibətləri və qlobal bazardakı vəziyyətlə bağlı açıqlamalar verib. O, oktyabrın 16-da “Rusiya Energetika Həftəsi” (РЭН-2026) forumunun plenar sessiyasında çıxış edərək bildirib ki, Rusiya ucuz və sabit enerji tədarükündən imtina etməyib, bu istiqamətdə qərarı siyasi mülahizələr əsasında Avropa özü verib.
Novakın sözlərinə görə, Rusiya mövcud müqavilə öhdəliklərini yerinə yetirir və zərurət yarandığı halda Avropaya enerji tədarükünün həcmini artırmağa hazırdır.
Qlobal enerji bazarındakı qiymət artımına toxunan baş nazirin müavini əsas səbəblərdən birinin fiziki təchizatla bağlı risklər olduğunu vurğulayıb. Onun fikrincə, enerji resurslarının istehsalından emalına, oradan da son istehlakçıya çatdırılmasına qədər bütün təchizat zəncirinin etibarlılığının təmin edilməsi hazırda bazarın əsas məsələlərindəndir.
Novak Fars körfəzində gəmiçiliklə bağlı məhdudiyyətlərin enerji bazarına təsirinə də diqqət çəkib. Onun açıqlamasına görə, mövcud vəziyyət sutkada təxminən 10 milyon barel neftin dünya bazarına çıxarılmasında risk yaradır.
Belə məhdudiyyətlər enerji ixracatçıları və istehlakçıları üçün nəqliyyat marşrutlarının uzanmasına, logistika xərclərinin artmasına və təchizatın təşkilində əlavə çətinliklərə səbəb olur.
Aleksandr Novak oktyabrın 12-də “Rossiya 24” telekanalına müsahibəsində Rusiya Energetika Nazirliyinin məlumatlarına istinadən Avropaya enerji resurslarının tədarükü ilə bağlı göstəriciləri açıqlayıb.
Onun təqdim etdiyi rəqəmlərə əsasən, 2026-cı ilin ilk doqquz ayında Rusiyanın Avropaya enerji resursları ixracının dəyəri 21,3 milyard dollar təşkil edib. 2022-ci ildən bəri ümumi tədarükün dəyərinin isə 320,7 milyard dollara çatdığı bildirilib.
Bu göstəricilər Qərb tərəfinin qiymətləndirmələrindən fərqlənir. Təqdim olunan məlumatlara görə, ABŞ tərəfi Rusiyanın enerji tədarükünün ümumi dəyərini təxminən 250 milyard dollar, Avropa Komissiyası isə 2022-ci ildən bəri Rusiyadan enerji idxalını 209 milyard dollar səviyyəsində qiymətləndirir.
Belə fərqlər Rusiyanın Avropaya enerji ixracının həcmi və dəyərinin hesablanmasında istifadə olunan metodologiyaların və əhatə dairəsinin fərqli ola biləcəyini göstərir.
MONETAR.AZ
