Bloomberg agentliyinin yaydığı məlumata görə, Braziliya hökuməti Yaxın Şərqdəki hərbi gərginlik səbəbindən qlobal neft bazarlarında müşahidə olunan kəskin dalğalanmaların ölkədaxili iqtisadiyyata təsirini minimuma endirmək məqsədilə fövqəladə yanacaq subsidiyaları və vergi güzəştləri paketinin müddətini uzadıb. Normal şərtlərdə mayın 31-də başa çatmalı olan bu antiinflyasiya tədbirləri daha iki ay, iyulun 31-nə qədər qüvvədə qalacaq.
Braziliya hakimiyyəti bu addımla həm daxili bazarda istehlakçıları qorumağı, həm də dövlətin ümumi fiskal (büdcə) hədəflərinə sadiq qalaraq tarazlığı qorumağı hədəfləyir.
Hökumətin qərarı ilə xüsusilə logistika və nəqliyyat sektoru üçün kritik əhəmiyyət kəsb edən dizel yanacağının qiymət mexanizmində ciddi struktur dəyişiklikləri edilib. Yerli neft emalı zavodları və yanacaq idxalçıları üçün hər litr dizelə görə 1,12 real (təxminən 0,22 ABŞ dolları) həcmində subsidiya saxlanılır. Əvvəlki iki ayrı proqram vahid qiymət sabitləşdirmə mexanizmində birləşdirilib.
Maliyyə Nazirliyi əvvəllər qüvvədə olan PIS və Cofins vergi güzəştlərini əvəz etmək üçün istehsalçı və idxalçılara hər litr üçün 0,35 real məbləğində yeni kompensasiya subsidiyası elan edib. Aviasiya kerosini və dizel yanacağına məcburi qaydada qarışdırılan biodizelin PIS və Cofins federal vergilərindən azad edilməsi müddəti də iyulun sonunadək uzadılıb.
Sosial cəhətdən həssas əhali qruplarını qorumaq məqsədilə mayeləşdirilmiş neft qazı (LPG — məişət qazı) proqramına ayrılan federal vəsaitin həcmi 330 milyon realdan 660 milyon reala (ikiqat) çatdırılıb. Bu maliyyələşmə sayəsində proqram çərçivəsində satılan hər 13 kiloqramlıq standart məişət qaz balonuna görə 11 real subsidiya tətbiq olunacaq ki, bu da aztəminatlı ailələrin enerji xərclərini xeyli azaldacaq.
Braziliyanın planlaşdırma naziri Bruno Moretti beynəlxalq enerji bazarlarındakı qeyri-müəyyənlik fonunda bu dəstəyin vacib olduğunu bildirsə də, qiymətlərin artıq müəyyən qədər enmə meyilində olduğunu vurğulayıb.
Maliyyə naziri Dario Duriqan bəyan edib ki, bu uzadılma ölkə büdcəsində əlavə kəsir yaratmayacaq. Dövlət neft şirkətlərinin qlobal ixrac mənfəətindən tutulan vergilər bu subsidiyaları tam kompensasiya edir. Bununla da Braziliya hökuməti bazarda qiymət sabitliyi yaratmaqla yanaşı, maliyyə intizamını pozmamaq prinsipinə sadiq qaldığını nümayiş etdirir.
MONETAR.AZ
