Qlobal neft bazarında qiymətlər 70 dollar həddindən aşağı enib. Bazar iştirakçıları bildirirlər ki, enişə əsas səbəb Hörmüz boğazı üzərindən tanker hərəkətlərinin artması və ABŞ-İran danışıqlarında irəliləyişlə bağlı təchizat risklərinin azalmasıdır.
Beynəlxalq Dəniz Təşkilatının təhlükəsizlik zəmanətlərindən sonra gəmi sahiblərinin əsas neft marşrutlarından biri olan Hörmüz boğazından keçidlərə daha inamla yanaşdığı qeyd olunur.
Beynəlxalq Enerji Agentliyinin məlumatına görə, Birləşmiş Ərəb Əmirliklərinin neft ixracı münaqişədən əvvəlki səviyyənin təxminən 85 faizinə çatıb. Son dövrdə Fars körfəzindən təxminən 60 milyon barrel neft satılıb.
Bunun nəticəsində neft qiymətləri müharibə dövründəki zirvə göstəricilərindən təxminən 40 faiz aşağı düşüb.
Qeyd olunur ki, ABŞ Enerji İnformasiya Administrasiyasının ölkədə xam neft ehtiyatlarının 1984-cü ildən bəri ən aşağı səviyyəyə enməsi barədə məlumatı belə bazardakı eniş tendensiyasını dəyişməyib.
MONETAR.AZ
