Alüminium ucuzlaşıb, dəmir filizi isə dəyər itirir

Alüminium ucuzlaşıb, dəmir filizi isə

Qlobal əmtəə birjalarında sənaye metallarının qiymətində kəskin geriləmə müşahidə olunur. ABŞ dollarının qlobal valyutalar qarşısında möhkəmlənməsi, geosiyasi yumşalma gözləntiləri və texnologiya sektorundakı satış dalğası fonunda alüminium həftəlik 7% ucuzlaşıb, dəmir filizi isə son dörd ilin ən uzunmüddətli itki seriyasını yaşayır.

"Bloomberg"in məlumatına görə, alüminiumun bu enişi 2025-ci ilin aprel ayından bəri qeydə alınan ən uzunmüddətli mənfi trenddir. London Metal Birjasında (LME) alüminiumun bir tonunun qiyməti 3158 dollara düşüb.

London və Sinqapur birjalarından daxil olan son rəsmi rəqəmlər sənaye xammalına olan tələbatın qısamüddətli kiçilməsini əks etdirir.

Vaşinqton və Tehran arasında əldə olunmuş müvəqqəti sülh sazişi, müharibə dövründə fəaliyyəti dayanan Yaxın Şərq alüminium zavodlarının yenidən tam gücü ilə işə düşəcəyi gözləntisini yaradıb. Region qlobal alüminium təklifinin onda birini təmin etdiyi üçün bu xəbər birjada təklif bolluğu (oversupply) gözləntisi yaradaraq qiymətləri endirib. baxmayaraq ki, Hörmüz boğazında gəmiyə edilən son hücum riskləri tam sıfırlamayıb.

Asiya texnologiya nəhənglərinin səhmlərində qeydə alınan geriləmə mis və alüminium kimi metallara birbaşa təsir edib. Bu metallar süni intellekt (AI) məlumat mərkəzlərində, mikrosxemlərdə və naqillərdə kritik xammal sayıldığından, texnoloji durğunluq metal tələbini azaldır.

Dəmir filizinin ardıcıl 7 həftə ucuzlaşaraq Sinqapur birjasında son ayların minimumuna ($96.95) enməsinin əsas səbəbi Çində polad istehsalçılarının (metallurgiya müəssisələrinin) mənfəət marjasının daralması və mövsümi tələbatın zəifləməsidir. Çin limanlarında yığılıb qalan xammal ehtiyatlarının yüksək olması və sülh sazişindən sonra enerji (kokslanan kömür, qaz) xərclərinin düşməsi poladın istehsal maya dəyərini, dolayısıyla dəmir filizinin qiymətini aşağı salır.

Sənaye metalları qlobal makroiqtisadiyyatın barometridir. "Jinrui Futures" analitiklərinin də qeyd etdiyi kimi, alüminium və dəmir filizinin ucuzlaşması yaxın perspektivdə qlobal tikinti və ağır sənaye sektorunda müəyyən bir soyumanın getdiyini göstərir.

Digər tərəfdən, dəmir filizinin psixoloji hədd olan 100 dolların altına düşməsi, dünyanın ən böyük polad istehsalçısı və xammal idxalçısı olan Çinin daşınmaz əmlak və infrastruktur sektorunda hələ də fundamental canlanmanın baş vermədiyinə dair birjalara kədərli bir siqnal ötürür. Enerji daşıyıcılarının sülh xəbərləri ilə ucuzlaşması xərcləri azaltsa da, tələb tərəfi güclənmədikcə metalların kəskin bahalaşması gözlənilmir.

MONETAR.AZ