Dünya bazarında neftin qiyməti cümə axşamı 95 dollar/barel ətrafında ticarət olunur. Gün ərzində qiymət 97 dollara yaxınlaşsa da, sonradan bir qədər geriləyib.
Monetar.az xəbər verir ki, Trading Economics-in məlumatına görə, qiymətlərə əsas təsir edən amillərdən biri Fars körfəzində tanker daşımalarının davam edən məhdudiyyətləridir.
ABŞ və İran arasında Fars körfəzindən neft ixracının bərpasına imkan verə biləcək razılaşma ilə bağlı danışıqların aparıldığı bildirilir. Tərəflərin Hörmüz boğazından keçən tankerlərə tətbiq olunan dəniz blokadalarının aradan qaldırılması və ABŞ-ın İrana qarşı sanksiyalarının yumşaldılması məsələlərini müzakirə etdiyi qeyd olunur.
Bununla yanaşı, Yəməndə İranla müttəfiq olan husilərin Səudiyyə Ərəbistanının Yanbu və Taif şəhərlərinə raket zərbələri endirməsi neft qiymətlərinin kəskin yüksəlməsinə səbəb olub. Yanbu Səudiyyə Ərəbistanının Qırmızı dəniz sahilində yerləşən əsas neft ixrac terminallarından biridir.
Hörmüz boğazından keçidlərin azalması da bazarda narahatlığı artırır. Məlumata görə, çərşənbə günü boğazdan cəmi 10 yük gəmisi keçib. Bu göstərici son 10 gün üzrə orta hesabla 17 gəmi təşkil edib.
Neft bazarında qiymət artımına baxmayaraq, ABŞ və İran arasında mümkün razılaşma ilə bağlı xəbərlər qiymətlərin gün ərzində əldə etdiyi yüksəlişi qismən geri verməsinə səbəb olub.
