Qərbi Avropanı bürüyən anomal istilər pik həddə çataraq iqtisadiyyatın strateji sahələrinə zərbə vurmağa başlayıb. Bloomberg agentliyinin məlumatına görə, Fransada havanın temperaturunun rekord həddə çatması fonunda kondisionerlərdən kütləvi istifadə elektrik şəbəkələrini və atom elektrik stansiyalarını (AES) ciddi təzyiq altında qoyub.
Sinoptiklər xəbərdarlıq edirlər ki, yüksək təzyiqli "isti hava günbəzi" (heat dome) havanı sıxaraq temperaturu süni şəkildə artırır. Artıq bəzi bölgələrdə termometrlər 40°C-ni ötüb, Parisdə isə tarixin ən isti iyun göstəricisi gözlənilir.
İstilik dalğası Fransada gündəlik həyatı iflic etməklə yanaşı, ölkənin enerji sənayesi və ərzaq təhlükəsizliyi üçün zəncirvari risklər yaradır.
Sinoptiklərin analizinə görə, bu anomal hava dalğası iyul ayına qədər davam edəcək. Avropanın rəqəmsal və sənaye infrastrukturu bu yay bərpa olunan enerji mənbələrinin (külək və su) zəifləməsi və AES-lərin istehsal məhdudiyyətləri səbəbindən ciddi "enerji kəsintisi" ssenariləri ilə üz-üzə qala bilər.
MONETAR.AZ
