Azərbaycanın aqrar sektorunda səmərəliliyin yüksəldilməsi və yüksək əlavə dəyərin yaradılması məqsədilə yeni strateji mərhələyə start verilir. Azərbaycan Prezidentinin köməkçisi, Prezident Administrasiyasının iqtisadi siyasət və sənaye məsələləri şöbəsinin müdiri Natiq Əmirov Qazax-Tovuz iqtisadi rayonu üzrə keçirilən regional müşavirədə bildirib ki, 2026–2030-cu illəri əhatə edən yeni Dövlət Proqramı çərçivəsində ölkədə intensiv meyvə bağlarının və istixana komplekslərinin sayı kəskin çoxaldılacaq.
Natiq Əmirov vurğulayıb ki, qarşıya qoyulan əsas hədəflər kənd təsərrüfatında rəqabət qabiliyyətini təmin etməyə, daxili resurslardan maksimum səmərəli istifadəyə və ölkənin ərzaq təhlükəsizliyinin daha da möhkəmləndirilməsinə xidmət edir.
Dövlət Proqramı çərçivəsində yaxın 4 il ərzində aqrar sahənin həm bitkiçilik, həm də infrastruktur blokunda əsaslı yeniliklərin tətbiqi planlaşdırılır.
Qarşıya qoyulan hədəflər kənd təsərrüfatında sadəcə kəmiyyət artımına deyil, yüksək səmərəliliyin təmin edilməsinə, yeni əlavə dəyərin yaradılmasına və ölkəmizin daxili ərzaq təhlükəsizliyinin keyfiyyətcə yeni mərhələyə keçməsinə əsaslanır.
