Milli Məclis Əmək Məcəlləsinə dəyişiklik edilməsi haqqında qanun layihəsini üçüncü oxunuşda qəbul edib. Dəyişiklik Azərbaycan dəniz limanlarında istismar olunan kranların küləkli hava şəraitində təhlükəsiz və səmərəli fəaliyyətini tənzimləyəcək.
Məsələ parlamentin oktyabrın 30-da keçirilən iclasının gündəliyinə daxil edilib.
Qanun layihəsinin əsas məqsədi müasir yükqaldırıcı qurğuların texniki dözümlülük göstəricilərini nəzərə almaqla, Azərbaycan Respublikasının Dəniz Limanları Reyestrinə daxil edilmiş limanlarda kranların istismar imkanlarını genişləndirməkdir.
Bu məqsədlə Əmək Məcəlləsinin 2-ci əlavəsinə dəyişiklik edilməsi təklif olunub. Yeni qaydalara əsasən:
-
Küləyin gücü 6–8 bal olduqda quruda istismar olunan kranlarla işlərin görülməsinə yalnız həmin kranların texniki pasportlarında nəzərdə tutulmuş hallarda icazə veriləcək.
-
Küləyin gücü 8 baldan artıq olduqda isə kranlarda bütün növ işlər mütləq dayandırılacaq.
Dəyişikliyin qəbulundan sonra texniki göstəriciləri imkan verən kranların müəyyən külək şəraitində fəaliyyətini davam etdirməsi mümkün olacaq.
Gözlənilir ki, bu yanaşma işçinin təqsiri olmadan işin dayandırılması hallarını azaldacaq, əmək məhsuldarlığının yüksəlməsinə və layihələrin vaxtında tamamlanmasına şərait yaradacaq. Eyni zamanda limanlarda iş prosesinin daha səmərəli təşkili hədəflənir.
Qanun layihəsi parlamentdə müzakirələrdən sonra üçüncü oxunuşda təsdiqlənib.
