Almaniyada istehlak qiymətlərinin illik artım tempi 2026-cı ilin oktyabr ayında sentyabrdakı 3,3 faizdən 2,8 faizə qədər azalıb. Almaniya Federal Statistika İdarəsinin bu gün açıqladığı ilkin məlumatlara görə, inflyasiyanın zəifləməsində enerji qiymətlərindəki artım tempinin aşağı düşməsi və baza inflyasiyasının azalması əsas rol oynayıb.
Avropa İttifaqının metodologiyası əsasında hesablanan ahəngləşdirilmiş istehlak qiymətləri indeksi (HICP) də oktyabrda illik müqayisədə 2,8 faiz artıb. Bu göstərici analitiklərin 3,1 faizlik proqnozundan və sentyabrda qeydə alınan 3,3 faizdən aşağıdır.
Aylıq müqayisədə istehlak qiymətləri oktyabrda 0,2 faiz azalıb. Halbuki sentyabrda 0,6 faizlik artım qeydə alınmış, analitiklər isə oktyabr üçün 0,1 faizlik yüksəliş gözləmişdilər. Aylıq HICP göstəricisi də 0,1 faiz geriləyib.
Ərzaq və enerji qiymətləri nəzərə alınmadan hesablanan baza inflyasiyası da zəifləyib. Belə ki, iyul, avqust və sentyabr aylarında 2,4 faiz səviyyəsində olan göstərici oktyabrda 2,1 faizə enib.
Sektorlar üzrə məlumatlar inflyasiyanın bir neçə istiqamətdə zəiflədiyini göstərir. Enerji daşıyıcılarının qiymət artımı sentyabrdakı 14,9 faizdən oktyabrda 12,2 faizə düşüb.
Xidmət sektorunda illik inflyasiya 2,7 faizdən 2,5 faizə, malların qiymət artımı isə 3,8 faizdən 3 faizə enib. Ərzaq məhsullarında qiymət artımı isə əvvəlki ayla müqayisədə dəyişməyərək 0,4 faiz təşkil edib.
Almaniyada inflyasiyanın, xüsusilə də baza inflyasiyasının zəifləməsi Avropa Mərkəzi Bankının (ECB) gələcək pul siyasəti ilə bağlı qərarları baxımından əhəmiyyətli göstərici hesab olunur.
Fransada illik inflyasiyanın 3,4 faizə yüksəldiyi bir vaxtda Avrozonanın ən böyük iqtisadiyyatında qiymət artımının səngiməsi region üzrə inflyasiya mənzərəsində fərqləri üzə çıxarır.
Bu göstəricilər ECB-nin dekabr iclası ərəfəsində faiz siyasəti ilə bağlı müzakirələrə təsir göstərə bilər. Almaniyada baza inflyasiyasının gözləniləndən daha aşağı səviyyəyə enməsi faiz artımından sonra daha uzun fasilə verilməsi ehtimalını gücləndirən amillərdən biri kimi qiymətləndirilir.
MONETAR.AZ
