Fransada istehlak qiymətlərinin artım tempi oktyabr ayında sürətlənib. Ölkənin Milli Statistika və İqtisadi Araşdırmalar İnstitutunun ilkin qiymətləndirməsinə əsasən, illik inflyasiya sentyabr ayındakı 3,1%-dən 3,4%-ə yüksəlib.
Aylıq müqayisədə də qiymətlərdə artım qeydə alınıb. Sentyabrda 0,3% ucuzlaşan istehlak qiymətləri oktyabrda 0,4% bahalaşıb.
İnflyasiyanın sürətlənməsində əsas amillərdən biri enerji daşıyıcılarının bahalaşmasıdır. Təbii qaz, neft məhsulları və elektrik enerjisinin qiymətlərinin artması nəticəsində enerji sektorunda bahalaşma ardıcıl dördüncü ay davam edib.
Xidmət sektorunda da inflyasiya təzyiqi güclənib. Xüsusilə nəqliyyat xərclərinin və otel-qonaqlama xidmətlərinin bahalaşması ümumi qiymət artımına təsir göstərib.
Sənaye malları üzrə isə ucuzlaşma davam etsə də, bu prosesin tempi bir qədər zəifləyib. Ərzaq məhsullarında qiymət artımı, əsasən təzə qida məhsullarının dinamikası hesabına nisbətən səngiyib. Tütün məhsullarının qiymətləri isə illik müqayisədə əvvəlki səviyyədə qalıb.
Avropa İttifaqının vahid metodologiyası əsasında hesablanan Ahəngləşdirilmiş İstehlak Qiymətləri İndeksi (HICP) də oktyabrda yüksəlib.
İllik ifadədə HICP sentyabr ayındakı 3,4%-dən 3,8%-ə çatıb. Aylıq göstərici isə əvvəlki ay qeydə alınan 0,3%-lik azalmadan sonra 0,4% artım nümayiş etdirib.
Fransada həm milli, həm də Avropa metodologiyası üzrə inflyasiya göstəricilərinin yüksəlməsi Avropa Mərkəzi Bankının pul-kredit siyasəti ilə bağlı müzakirələri yenidən aktuallaşdırır.
Enerji və xidmət qiymətlərində artımın davam etməsi inflyasiyanın dayanıqlılığı ilə bağlı narahatlıqları gücləndirir. Eyni zamanda iqtisadi fəallığın zəifləməsi ilə qiymət artımının paralel davam etməsi ehtimalı Avropada stagflyasiya risklərini də gündəmə gətirir.
MONETAR.AZ
