Yaponiya Bankı (BOJ) bu gün keçirilən iclasında uçot dərəcəsini gözlənildiyi kimi 1,25% səviyyəsində saxlayıb. Bununla yanaşı, tənzimləyici inflyasiya proqnozunu yüksəldib və əvvəlki illərdə monetar stimullaşdırma proqramları çərçivəsində aldığı birja investisiya fondlarının (ETF) satışını sürətləndirmək qərarına gəlib.
Pul-kredit siyasəti komitəsinin 9 üzvündən 8-i faiz dərəcəsinin dəyişdirilməməsinə səs verib. İdarə Heyətinin üzvü Takada Hacime (Hajime Takada) isə uçot dərəcəsinin 25 baza bəndi artırılmasını təklif edərək qərara qarşı çıxıb.
Yaponiya Bankının bəyanatında bildirilir ki, dəyişkən təzə ərzaq və enerji qiymətləri nəzərə alınmadan hesablanan baza istehlak qiymətləri indeksi (Core CPI) 2%-lik qiymət sabitliyi hədəfinə ümumilikdə uyğundur. Mərkəzi bank inflyasiyanın təxminən bu səviyyədə qalacağını gözləyir.
Eyni zamanda, BOJ 2027-ci ilin martında başa çatan maliyyə ili üçün baza inflyasiya proqnozunu artırıb. Əvvəllər 2,2–2,7% diapazonunda nəzərdə tutulan göstərici indi 2,4–2,7% səviyyəsində qiymətləndirilir.
Tənzimləyici orta və uzunmüddətli inflyasiya gözləntilərinin yüksəlməsi, eləcə də baza inflyasiyasının 2%-lik hədəfi üstələməsi ehtimalını əsas risklər sırasında göstərib.
Mərkəzi Bankın diqqət çəkdiyi əsas amillər arasında enerji daşıyıcılarının bahalaşması, süni intellekt sektorundan qaynaqlanan yüksək tələbat və ienin zəif məzənnəsi yer alır.
Bu amillər qiymətlərə əlavə təzyiq yarada və inflyasiyanın hədəf səviyyədən yuxarı qalmasına səbəb ola bilər. Buna görə də BOJ qiymət dinamikasını və inflyasiya gözləntilərini yaxından izləyir.
Yaponiya Bankı monetar stimullaşdırma proqramları çərçivəsində topladığı ETF portfelinin satışını da sürətləndirmək qərarına gəlib.
2027-ci ilin yanvarından etibarən fondların illik satış həcminin 860 milyard ienə, yəni təxminən 5,47 milyard dollara çatdırılması planlaşdırılır. Müqayisə üçün, əvvəlki illik satış göstəricisi 330 milyard ien təşkil edirdi.
Bu qərar mərkəzi bankın maliyyə bazarlarına uzun müddət davam edən genişmiqyaslı dəstəyini tədricən azaltmaq niyyətini göstərir.
Beləliklə, Yaponiya Bankı faiz dərəcəsini sabit saxlasa da, inflyasiya proqnozunu yüksəltməsi və ETF satışını genişləndirməsi pul-kredit siyasətində mərhələli sərtləşmə istiqamətinin davam etdiyinə işarə edir.
MONETAR.AZ
