ABŞ-da sentyabr ayında inflyasiya təzyiqləri artıb, ölkə iqtisadiyyatı isə 2026-cı ilin üçüncü rübündə analitiklərin gözləntilərini üstələyən templə böyüyüb. Bu göstəricilər Federal Ehtiyat Sisteminin (FED) dekabr iclasında faiz dərəcələrini artıracağı ilə bağlı bazar ehtimallarını gücləndirib.
Oktyabr iclasında faiz dərəcələrini dəyişməz saxlayan FED-in dekabrın 8–9-da keçiriləcək növbəti toplantısında borclanma xərclərini yüksəldə biləcəyi gözlənilir.
ABŞ Ticarət Nazirliyinin məlumatına görə, fərdi istehlak xərcləri indeksi (PCE) sentyabr ayında aylıq müqayisədə 0,5% artıb. Avqustda bu göstərici 0,3% təşkil etmişdi.
Sentyabr ayına qədər olan 12 aylıq dövrdə ümumi PCE inflyasiyası 3,4%-dən 3,6%-ə yüksəlib. Qiymət artımında enerji xərclərinin yüksəlməsi də mühüm rol oynayıb. Belə ki, benzin və digər enerji daşıyıcılarına çəkilən aylıq xərclər 9,2% artıb.
Ərzaq və enerji qiymətlərini nəzərə almayan baza PCE indeksi isə sentyabrda aylıq ifadədə 0,3%, illik müqayisədə 3,1% yüksəlib. Bu göstərici FED-in inflyasiya meyillərini qiymətləndirərkən xüsusi diqqət yetirdiyi əsas indikatorlardan biridir.
İqtisadi artım da gözləntiləri üstələyib. ABŞ-ın real ümumi daxili məhsulu (ÜDM) üçüncü rübdə 3,4% artıb. Halbuki analitiklərin proqnozu 3,2% təşkil edirdi. İkinci rübdə iqtisadi artım 2,2% olmuşdu.
İqtisadiyyatın güclü artım nümayiş etdirməsi və enerji qiymətlərinin bahalaşması fonunda inflyasiyanın sürətlənməsi FED-in pul-kredit siyasətini sərtləşdirməsi ehtimalını artırır.
Dekabr iclasında faiz qərarı verilərkən həm qiymət artımının davamlılığı, həm də iqtisadi fəallığın gücü əsas amillərdən olacaq.
MONETAR.AZ
