Venesuela Neft İxrac Edən Ölkələr Təşkilatından (OPEC) çıxmaq imkanını qiymətləndirir. "Bloomberg News" məlumatlı mənbələrə istinadən xəbər verir ki, bu məsələ artıq ABŞ rəsmiləri ilə də müzakirə olunub, lakin hələlik yekun qərar qəbul edilməyib.
Venesuela 1960-cı ildə OPEC-in yaradılmasında iştirak edən beş təsisçi ölkədən biri olub. Buna görə də təşkilatdan mümkün çıxış həm tarixi, həm də siyasi baxımdan mühüm hadisə hesab olunur.
Məlumata görə, bu məsələ Vaşinqton və Karakas arasında münasibətlərin istiləşməsi, eləcə də ABŞ-nin Venesuelanın neft ehtiyatlarına uzunmüddətli çıxış əldə etməsi ilə bağlı aparılan danışıqlar fonunda gündəmə gəlib. Bildirilir ki, tərəflər bir neçə neft yatağının 100 il müddətinə icarəyə verilməsi variantını da müzakirə edirlər.
"Bloomberg"in sorğusuna əsasən, Venesuela 2026-cı ilin iyul ayında gündəlik təxminən 1,16 milyon barel neft hasil edib. Bu göstərici ölkənin təxminən on il əvvəlki hasilat səviyyəsinin yarısından da aşağıdır. Bu səbəbdən Venesuelanın OPEC-dən çıxmasının qlobal neft təklifinə birbaşa təsirinin məhdud olacağı gözlənilir.
Bununla belə, analitiklər hesab edirlər ki, belə bir addım OPEC-in daxili birliyinə və bazara təsir imkanlarına dair narahatlıqları artıra bilər. Xüsusilə, Birləşmiş Ərəb Əmirliklərinin daha əvvəl təşkilatdan ayrılması fonunda Venesuelanın da çıxışı kartelin qlobal neft bazarındakı nüfuzunun zəifləməsi ilə bağlı müzakirələri gücləndirə bilər.
MONETAR.AZ
