Çin 2025-ci il ərzində ilkin alüminium idxalını ötən ilin göstəriciləri ilə müqayisədə 51% artıraraq 5,71 milyard dollara çatdırıb. Bu barədə Çinin Baş Gömrük İdarəsinin (BGİ) materiallarında deyilir.
Bu həcm ötən il üzrə LME-nin orta qiymətinə (təxminən 2,65 min dollar/ton) əsasən təxminən 2,16 milyon ton təşkil edir.
Dekabr ayında Çin Rusiyadan 479 milyon dollar dəyərində alüminium idxal edib ki, bu da bir il əvvəlki göstəricidən 33% çoxdur.
Rusiyadan emal olunmuş mis idxalı 2025-ci ildə dəyər ifadəsində 85% artaraq 4,21 milyard dollara çatıb (ötən il 2,27 milyard dollar idi). Bu, həmin dövr üzrə LME-nin orta qiymətinə (təxminən 9,97 min dollar/ton) əsasən təxminən 422 min ton deməkdir.
Dekabrda Rusiyadan emal olunmuş mis tədarükü 321 milyon dollar səviyyəsində qiymətləndirilib ki, bu da illik müqayisədə 44% çoxdur (223 milyon dollar).
Mis filizi və konsentratının idxalı 2025-ci ildə dəyər baxımından iki dəfədən çox artaraq 3,22 milyard dollara çatıb (ötən il 1,47 milyard dollar). Çinə mis konsentratının iri tədarükçülərindən biri Zabaykalye bölgəsində yerləşən “Norilsk Nikel”in Bystrinski Mədən-Saflaşdırma Kombinatıdır.
Rusiyadan emal olunmamış nikel tədarükü ötən il 73% artaraq 1,36 milyard dollara yüksəlib (ötən il 788 milyon dollar). Bu, həmin dövr üzrə LME-nin orta qiymətinə (15,35 min dollar/ton) əsasən təxminən 88 min ton təşkil edir.
Eyni zamanda nikel filizi və konsentratının tədarükü illik müqayisədə 11% azalaraq 284 milyon dollara düşüb.
Çinin Rusiyanın əlvan metallar tədarükündə payı 2022-ci ildən artmağa başlayıb. “Norilsk Nikel” və “Rusal” kimi əsas Rusiya əlvan metal istehsalçıları Aİ və ABŞ-ın sanksiya siyahılarına daxil edilməsə də, Avropa istehlakçıları müqavilələrdən imtina ediblər. Bundan əlavə, 2024-cü ilin aprelində Rusiya əlvan metallarının LME anbarlarına tədarükünə qoyulan qadağa da təsir göstərib. LME anbarlarına satış Rusiya metalının realizasiyası üçün mühüm ehtiyat mexanizmi idi, çünki əsas satışlar ikitərəfli müqavilələr çərçivəsində həyata keçirilir.
Rusiyadan ABŞ-a alüminium ixracı 2023-cü ilin sonunda ABŞ-ın 200% həcmində qoruyucu rüsumlar tətbiq etməsindən sonra dayandırılıb. Daha sonra Aİ də 2025-ci ilin fevralında Rusiya alüminiumu üçün 275 min tonluq kvota müəyyən edib ki, bu da 2024-cü il idxalının 80%-nə bərabərdir. Rusiyadan alüminium idxalı tam şəkildə 2026-cı ilin sonuna qədər qadağan ediləcək.
“Rusal”ın gəlirlərində Asiyanın payı 2025-ci ilin birinci yarısında 43%-dən 53%-ə yüksəlib, Avropanın payı isə 22%-dən 16%-ə enib.
MONETAR.AZ
