İngiltərə Bankının rəhbəri Endryu Beyli süni intellektin (Sİ) mənfi təklif şoklarının müşahidə olunduğu bir dövrdə iqtisadiyyat üçün müsbət təklif şoku rolunu oynaya biləcəyini bildirib.
Beyli qeyd edib ki, mərkəzi bank hazırda enerji qiymətlərinin inflyasiyaya dolayı təsirinin əvvəl gözləniləndən zəif olduğunu müşahidə edir. Bununla belə, o, bu təsirlə bağlı yekun nəticələr çıxarmaq üçün hələ tez olduğunu vurğulayıb. İngiltərə Bankının sentyabr iclasının sənədlərində də enerji qiymətlərinin digər məhsul və xidmətlərə ötürülməsinin indiyədək məhdud olduğu qeyd olunur.
Beylin sözlərinə görə, enerji qiymətlərinin uzun müddət yüksək qalması pul-kredit siyasəti ilə bağlı qərarları daha da çətinləşdirə bilər. İngiltərə Bankı sentyabr iclasında uçot dərəcəsini 3,75 faiz səviyyəsində saxlayıb.
Mərkəzi bankın rəhbəri həmçinin ipoteka faizlərinin pul-kredit siyasətinin sərtləşmə dərəcəsinin qiymətləndirilməsində nəzərə alındığını bildirib. Onun sözlərinə görə, fevralın sonundan etibarən Böyük Britaniyada ipoteka faizləri təxminən 1 faiz bəndi yüksəlib və bu, maliyyə şərtlərinin əhəmiyyətli dərəcədə sərtləşməsi deməkdir.
İngiltərə Bankının son proqnozlarına görə, enerji qiymətlərindəki artım yaxın rüblərdə inflyasiyaya birbaşa təsiri gücləndirə bilər. Eyni zamanda, bank süni intellektlə bağlı texnologiya və komponentlərə yüksək tələbin bəzi sahələrdə qiymət təzyiqlərini artırdığını da qeyd edib.
Beyli isə enerji şokunun iqtisadiyyata təsirlərinin necə formalaşacağının və süni intellektin məhsuldarlıq və təklif imkanlarına təsirinin daha aydın görünməsi üçün əlavə məlumatların lazım olduğunu vurğulayıb.
MONETAR.AZ
