Argentinada istehlak qiymətlərinin artım tempi avqust ayında nəzərəçarpacaq dərəcədə zəifləyib. Aylıq inflyasiya 1,7%-ə düşərək son 14 ayın ən aşağı səviyyəsinə geriləyib.
Milli statistika agentliyi INDEC-in məlumatına görə, göstərici iqtisadçıların proqnozlaşdırdığı 1,7%-lik medianla üst-üstə düşüb. İyul ayında ölkədə aylıq inflyasiya 2,1% təşkil etmişdi.
İllik inflyasiya da cüzi azalaraq iyuldakı 33,8%-dən 33,5%-ə enib. Bu göstərici analitiklərin 33,6%-lik median proqnozundan da bir qədər aşağı olub. İlin əvvəlindən avqustun sonunadək Argentinada kumulyativ inflyasiya 21,3% təşkil edib.
Avqust ayında qiymət artımına əsas töhfələrdən biri ərzaq məhsulları və alkoqolsuz içkilərdən gəlib. Bu kateqoriyada qiymətlər 1,7% artıb. Ən yüksək bahalaşma isə mənzil və kommunal xidmətlər qrupunda qeydə alınıb – 2,8%.
Qış mövsümünün sonuna təsadüf edən endirim kampaniyaları geyim və ayaqqabı qiymətlərinə də təsir göstərib. Bu kateqoriyada qiymətlər 0,6% azalıb. İstirahət və mədəniyyət xərcləri isə qış tətilinin başa çatmasından sonra əvvəlki ayla müqayisədə dəyişməyib.
Baza istehlak qiymətləri indeksi avqustda 1,8% yüksəlib. Artım əsasən icarə haqları və mədəniyyət xidmətlərinin bahalaşması ilə əlaqələndirilir. Tənzimlənən qiymətlər isə elektroenergetika, qaz, ictimai nəqliyyat və ödənişli tibbi xidmətlər üzrə tariflərin yüksəlməsi nəticəsində 2,2% artıb.
Mövsümi qiymətlər 0,9% aşağı düşüb. Buna turizm paketləri və geyimlərin ucuzlaşması səbəb olub. Bununla belə, tərəvəz, kökümeyvəlilər, paxlalılar və meyvələrin bahalaşması mövsümi qiymətlərdəki azalmanı qismən kompensasiya edib.
Avqust ayında malların qiyməti 1,4%, xidmətlərin qiyməti isə 2% artıb. Regional göstəricilərə görə, ən yüksək aylıq inflyasiya 1,8% olmaqla Şimal-Qərb regionunda qeydə alınıb. Böyük Buenos-Ayres və Pampa regionlarında isə qiymətlər müvafiq olaraq 1,6% yüksəlib.
MONETAR.AZ
